Jean Todt, president i FIA -s, duke folur për gjendjen shëndetësore të Michael Schumacher ka nxjerrë në pah rolin e rëndësishëm që ka patur Corinna, bashkëshortja e “Mbretit” të Formula 1 në shërimin e tij.
Shtatë herë kampioni i botës pësoi një aksident të rëndë teksa bënte ski në Alpet Franceze në vitin 2013. Që atëherë, shëndeti i tij ka qenë një mister.
Todt dhe ish-piloti gjerman krijuan një miqësi të ngushtë edhe pasi Schumacher u largua nga Ferrari në 2006.
Presidenti i FIA-s është një nga njerëzit më të afërt me të dhe familjen e tij.
“Falë punës së mjekëve dhe ndihmës së Corinnas, e cila donte që Michael të mbijetonte (dhe ajo e bëri), por me pasoja. Tani për tani ai po lufton kundër atyre pasojave dhe unë shpresoj se gjërat do të përmirësohen pak nga pak,” – tha Todt për gazetën gjermane “Bild”.
Francezi nxjerr në pah mënyrën në të cilën bashkëshortja e Schumacherit ka arritur të përballojë fatkeqësitë dhe mënyrën se si ajo është kujdesur për familjen e saj.
“Kam kaluar shumë kohë me Corinnan, që kur Michael pati atë aksident të rëndë. Ajo është një grua e madhe dhe ka marrë komandën e familjes. Nuk e prisja që kjo të ndodhte, por kështu ndodhi dhe nuk kisha zgjidhje tjetër,” – vazhdoi ai.
