Vitin tjetër mund të zhvillohen tri gara të Formula 1 në Amerikë. Pas pistave të Austin dhe Majemi, në kalendarin e garave për vitin 2023 pritet të jetë edhe një tjetër garë qytetase, ajo e Las Vegas.
Vendimi zyrtar pritet të jepet në gjysmën e parë të këtij viti, ndërkohë që bisedimet mes Formula 1 dhe Komisionit të Sportit në Nevada kanë kohë që kanë nisur.
Në rast se gjërat nuk mbyllen brenda afateve të kërkuara nga FIA, atëherë gara e Las Vegas do të jetë në kalendarin e vitit 2024. Konfirmohet se bëhet fjalë për një garë qytetase, në rrugët e Las Vegas, duke kaluar në disa nga zonat dhe kazinotë më të njohura të këtij qyteti. Një pistë që mund të jetë deri në 2km e gjatë.
Drejtuesi e Formula 1 kanë qenë disa herë në Las Vegas për të parë zonat e mundshme ku mund të “ndërtohet” një pistë qytetase. Në vitet 1981 dhe 1982 në këtë qytet janë zhvilluar dy gara, në zonën e parkimit të hotelit të famshëm Caesars Palace.
