Pavarësisht se u rendit i katërti në garën e fundit të Formula 1 zhvilluar në Australi, piloti britanik Lewis Hamilton është i pakënaqur. Mercedes grumbulloi pikë të rëndësishme në garën për konstruktorë, por makina gjermane është larg Ferrarit dhe Red Bull.
“Në Melburn u detyrova të kënaqesha me vendin e katërt. Motori tejnxehej dhe u detyrova të hiqja këmbën nga gazi për të mos e dëmtuar, duke mos dueluar dot me Russell”, u shpreh Hamilton, 7 herë kampion bote në Formula 1.
Ai shprehet i pakënaqur me ecurinë e Mercedes këtë sezon. “Edhe në Australi nuk kemi bërë asnjë hap përpara. Makina ishte e njëjtë si në dy garat e para. Gjithsesi, fakti që u renditëm në vendet 3-4 është pozitiv, duke parë që jemi në vendnumëro”.
“Nga gara e Australisë mësuam shumë, ndërkohë që ende nuk kemi sjellë disa modifikime të rëndësishme në makinë. Duhet të presim dhe të shrpesojmë se gjërat do të ndryshojnë në garat e radhës”, tha Hamilton.
