Verstappen “arratiset” në krye

Formula 1

Verstappen “arratiset” në krye

Më: 12 qershor 2022 Në ora: 14:51
Verstappen “arratiset” në krye

Katastrofë është fjala e cila përmbledh më së miri përformancën e Ferrarit në Azerbaixhanit teksa ai që fitoi garën ishte Max Verstappen i cili u nis nga vendi i tretë dhe e përfundoi në shkallën më të lartë të podiumit.

Shenjat se nuk do të ishte një ditë e mirë për “kokëkuqjen” u panë që në start me Sergio Perez i cili parakaloi Cherles Leclerc që u nis nga Pole-Position. Ndërkohë, monegasku i rezistoi sulmeve të Max Verstappen, ndërkohë që në xhiron e katërt, Carlos Sainz tërhiqet nga gara për shkak të problemeve me marshet.

Në vazhdim, Leclerc futet në bokse dhe Verstappen i hapet rruga për të parakaluar Perez e për të marrë kryesimin, ndërsa meksikanit iu bë e qartë nga skuderia se nuk duhej të luftonte ashpër me shokun e skuadrës për të mos rrezikuar përplasjen. Gjithsesi, në xhiron e 20-të kur Leclerc kishte marrë kryesimin e garës pasi Verstappen u fut në bokse, ndodh e papritura.

Motorri i Ferrarit përfundon në tym dhe Leclerc detyrohet të tërhiqet me pilotin holandez dhe Perez që kishin rrugën e hapur për të dërguar Red Bullin te triumfi. Për Verstappen ishte suksesi i parë në pistën e Baku (triumfi i pestë nga tetë gara në këtë sezon), ndërsa tashmë kampioni i Botës në fuqi arratiset në krye të klasifikimit me plot 150 pikë ndërsa ndiqet nga Perez që ka grumbulluar 129 pikë, teksa shpresat e Leclerc për një sukses në këtë Botëror marrin një goditje të madhe me 23-vjeçarin që mbetet në kuotën e 116 pikëve.

Sa i përket pjesës tjetër të pilotëve, një paraqitje e shkëlqyer edhe nga George Russell i Mercedes i cili e mbylli garën në vendin e tretë dhe ruan traditën e këtij sezoni teksa në asnjë prej garave të zhvilluara deri më tani nuk është renditur asnjëherë më poshtë se vendi i pestë. Nga ana tjetër, Hamilton u rendit i katërti, ndërsa pas britanikut u rendit Gasly.

Në vendin e gjashtë Vettel, ndërsa në dhjetëshen e parë përfunduan edhe Alonso, Ricciardo, Norris e Ocon. Jashtë zonës së pikëve, Bottas apo edhe Mick Schumacher.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat