Rion Tytynxhiu shkëlqeu në garën GT3 e-sport në Snetterton

Formula 1

Rion Tytynxhiu shkëlqeu në garën GT3 e-sport në Snetterton

Më: 3 korrik 2025 Në ora: 20:38
Pamje nga gara

Shtegu virtual i Snetterton u ndez nga gara e radhës në kuadër të Kampionatit GT3 në Esport, e cila u zhvillua në ambientet e SIM RACE Kosova dhe u organizua nga Eurogoma Racing Team.

Pavarësisht numrit të reduktuar të pjesëmarrësve, vetëm pesë garues, për shkak të sezonit veror, gara solli emocione dhe performanca të jashtëzakonshme. Ylli i padiskutueshëm i mbrëmjes ishte Rion Tytynxhiu, piloti i talentuar vetëm 16 vjeç, i cili dominoi garën.

Rioni siguroi pole position gjatë kualifikimeve dhe e udhëhoqi garën prej 1 ore nga fillimi deri në fund, duke treguar maturi dhe kontroll mbresëlënës.

Drilon Ahmetaj, kampioni aktual i GT3, e përfundoi garën në vendin e dytë pas një performance të fortë dhe të qëndrueshme. Këto pikë të fituara ishin të mjaftueshme për ta mbajtur vendin e parë në renditjen e përgjithshme të kampionatit.

Vendi i tretë i takoi Blendi Ferizit, i cili pati një paraqitje solide në debutimin e tij në kampionatin GT3, duke ngjitur menjëherë shkallën e podiumit.

Për fat të keq, Baran Karabeg dhe Visar Gjikolli nuk arritën ta përfundonin garën për shkak të dëmeve të pësuara gjatë betejës në pistë.

Gara e radhës në kalendarin GT3 do të zhvillohet më 16 korrik 2025, në pistën e famshme të Silverstone, ku garuesit do të përballen me kushte shiu, duke premtuar një tjetër spektakël të vërtetë në këtë sezon emocionues.

comment Për komente lëvizni më poshtë
Sot mund të lexoni Shfletoni kopertinat