Kompania nga Kosova thotë se vetëm tre persona janë të lënduar nga aksidenti në Gjermani
Kompania Dubova Reisen konfirmoi për Radion Evropa e Lirë se një autobus i saj, me udhëtarë nga Kosova u aksidentua në Gjermani në orët e para të 20 gushtit.
Nga kjo kompani thanë se vetëm tre pasagjerë kanë pësuar lëndime.
“Fatmirësisht, pasagjerët janë mirë, vetëm tre nga ta janë me lëndime të lehta për shkak të dëmtimit të xhamave. Aksidenti ndodhi rreth orës 00:30. Autobusi ishte në trasen e tij, një makinë ka ardhur nga e majtë, nga ana e shoferit, duke ia humbur drejtimin”, thanë nga kjo kompani.
Media gjermane, Rosenheim24, duke cituar policinë gjermane, tha se 30 persona u lënduan gjatë aksidentit.
Autobusi i aksidentuar po bartte 50 pasagjerë, kur u përplas me një kamion të ngarkuar me mallra në autostradën A8, afër Irsshenbergut gjatë natës, sipas kësaj media.
Policia gjermane tha se 30 persona u lënduan, dy prej tyre u hospitalizuan ndërkaq katër të tjerë u dërguan në klinika për ekzaminime të mëtejme.
Autobusi ishte nisur drejt Mynihut dhe shoferi, slloven 49-vjeçar, si duket e pa kamionin shumë vonë. Autobusi i përplas në pjesën e pasme të kamionit, pavarësisht se shoferi tentoi që të shmangte aksidentin.
Pas këtij aksidenti, autoritetet gjermane mbyllën për trafik segmentin A8 për gati dy orë./REL
Detaje nga aksidenti i autobusit nga Kosova në Gjermani
Pak minuta pas mesnatës, një aksident i rëndë trafiku raportohet të këtë ndodhur në autostradën A8 pranë Irschenbergut në Gjermani.
Siç raportojnë mediat në Gjermani, rreth orës 0.05 të mëngjesit, një autobus me 50 pasagjerë goditi një rimorkio kamioni të ngarkuar me perime. Kamioni, i drejtuar nga një shtetas polak 46-vjeçar, po udhëtonte për në Munih kur shoferi i autobusit nga Kosova, një shtetas slloven 49-vjeç, me sa duket nuk e pa me kohë rimorkion.
“Rosenheim24” raporton se autobusi, i mbushur me udhëtarë nga Kosova, u përplas me pjesën e pasme të rimorkios pavarësisht manovrave të shmangies. Pjesa e përparme e autobusit ngeci në kamion dhe u dëmtua rëndë. Rimorkioja u dëmtua gjithashtu rëndë.
Ndërkaq “radio-charivari.de”, duke u thirrur në njoftimin e policisë, thotë se autobusi nga Kosova goditi një rimorkio kamioni të ngarkuar me perime.
Raportohet se një autobus nga Kosova u aksidentua në Gjermani, 10 të lënduar
Një autobus nga Kosova po raportohet se është aksidentuar në Gjermani.
Si pasojë e këtij aksidenti raportohet se janë lënduar 10 persona, nëntë prej tyre lehtë kurse një tjetër sipas policisë është lënduar më rëndë.
Ngjarja ndodhi pak pas mesnatës në autostradën A8 në Irschenberg.
Mediat gjermane raportojnë se autobusi me 41 pasagjerët brenda u aksidentua me një kamion teksa po përpiqej ta tejkalonte.
Në vendin e ngjarjes kanë dalur një numër i madh i ekipeve emergjente, policisë dhe zjarrfikësve.
Qarkullimi në këtë autostradë në drejtim të Munchenit u ndërpre për dy orë e gjysmë.