Hyseni me bashkëpunëtorët bëjnë homazhe te varrezat e dëshmorëve në 23-vjetorin e Betejës së Zhegocit

Gjilani

Hyseni me bashkëpunëtorët bëjnë homazhe te varrezat e dëshmorëve në 23-vjetorin e Betejës së Zhegocit

Më: 15 prill 2022 Në ora: 14:31
Homazhet

Kryetari i Komunës së Gjilanit, Alban Hyseni, bashkë me nënkryetaren Leonora Morina Bunjaku, kryesuesin e Kuvendit, Arianit Sadiku dhe bashkëpunëtorët tjerë, kanë bërë sot homazhe te varrezat e dëshmorëve në shënim të 23-vjetorit të Betejës së Zhegocit.

Kryetari Hyseni ka thënë se përkujtimet e tilla duhet të jenë jo vetëm një akt simbolik, por një kthim prapa për të kuptuar se ku kemi qenë dhe ku kemi arritur.

“Për neve si udhëheqje e Komunës është shumë me rëndësi që t’i përkujtojmë ata, të cilëve ua kemi për borxh që të punojmë mirë e drejtë. Përkujtimet e tilla duhet të jenë jo vetëm një akt simbolik, por një kthim prapa për të kuptuar se ku kemi qenë dhe ku kemi arritur. Nga vendi ku pushojnë ata që kanë dhënë më të shtrenjtën për liri, u themi lavdi dëshmorëve dhe i përkujtojmë me nder dhe krenari”, ka thënë kryetari Hyseni.

Ish-komandanti i Zonës Operative të Karadakut, Ahmet Isufi, ka thënë se me Betejën e Zhegocit u arrit që të përmbyllet terreni i Kosovës me brigadat e zonat të cilat nën emblemën e UÇK-së sollën lirinë e Kosovës.

“Beteja e Zhegocit është njëra nga betejat më të lavdishme të UÇK-së”, ka thënë Isufi.

Më pas, kryetari Hyseni me bashkëpunëtorët kanë bërë homazhe edhe tek bustet e dëshmorëve, Pajazit Ahmet e Alban Ajeti, para lapidarit te Hanet e Zhegocit dhe të gjithë lapidarët e dëshmorëve, sikurse edhe takimi te pllaka e dëshmorëve në Tërbovc.

Shënimi i 23-vjetorit të Betejës së Zhegocit përmbyllet me një Akademi përkujtimore në ora 16:00, në sallën e teatrit të qytetit, ku do të shfaqet edhe një dokumentar kushtuar dëshmorit Nijazi Osmani.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat