Agjencia Kundër Korrupsionit nis hetimet për konflikt interesi në Spitalin e Mitrovicës

Mitrovica

Agjencia Kundër Korrupsionit nis hetimet për konflikt interesi në Spitalin e Mitrovicës

Më: 13 shtator 2022 Në ora: 23:17
Foto ilustrim

Pasi e shkarkoi Ferdane Myftarin, drejtoresha e Spitalit të Mitrovicës, Luljeta Zhubi, emëroi një ushtrues tjetër detyre në Drejtorinë e Administratës dhe Shërbimeve të Përbashkëta. Punët e drejtoreshës në këtë drejtori përkohësisht do t’i kryejë Lutfije Gashi.

Mirëpo, kjo nuk është pozita e vetme që Gashi mban në Spitalin e Mitrovicës. Ajo këtë detyrë do ta ushtrojë njëkohësisht me detyrat e zyrtares së lartë financiare.

Ushtrimi i dy funksioneve udhëheqëse nga ana e Gashit aktivizoi Agjencinë Kundër Korrupsionit, për shkak të dyshimit se kjo paraqet konflikt interesi.
Nga kjo agjenci e kanë konfirmuar për KIKS-in se janë duke e hetuar këtë rast.

“Agjencia për Parandalimin e Korrupsionit është duke e trajtuar këtë rast. Procedura gjatë trajtimit të rasteve të konfliktit të interesit është konfidenciale. Agjencia i bën publike vetëm rezultatet finale pas mbledhjes dhe analizës të informatave dhe dëshmive të nevojshme konform legjislacionit në fuqi”, thuhet në përgjigjen e kësaj agjencie.

Emërimin e Gashin në një pozitë të dytë brenda Spitalit të Mitrovicës e ka arsyetuar drejtoresha Zhubi, e cila tha se nuk ka pasur person tjetër kompetent për këtë pozitë.

KIKS Kosova ka kontaktuar me Lutfije Gashin, por ajo pasi e kuptoi se po bisedonte me gazetaren e emisionit, e mohoi se ishte ajo dhe më nuk është përgjigjur në telefon.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Më të lexuarat
Sot mund të lexoni Shfletoni kopertinat