Gazetari Huizhong Wu ka hetuar për CNN ligjin pamëshirshëm Indian për shkurorëzim. Më poshtë ju sjellim pjesë të storjes së tij.
Farha, nëna 30-vjeçare e tre fëmijëve, vitin e kaluar pas vetëm tri fjalëve humbi burrin e saj. Kjo ndodhi pasi një vajza e saj 10-vjeçare e luti për pesë rupi (shtatë centë), që të blinte fishekzjarrë për festa. Burri në tërbim i tha tri herë ‘talaq’, që menjëherë çon në shkurorëzim.
‘Talaq’ (shkurorëzim, nga arabishtja), është një praktikë kontroverse që sot bëhet madje me fjalë në telefon ose me mesazh. Në teori, ndarja duhet të bëhet për tre muaj, por në praktikë nis menjëherë dhe gruaja duhet të dalë nga shtëpia.
India është një nga vendet e pakta që nuk e kanë ndalur këtë rregull, por kjo mund të ndryshojë. Autoriteti suprem ligjor në Indi – Komisioni Kombëtar i Ligjit dhe Gjykata Supreme – në tetor 2016 kanë bërë një studim mbi reformën e së drejtës familjare për të diskutuar ndryshimet e mundshme, veçanërisht në lidhje me ‘talaqun’.
Farha, që thotë se në Indi gratë nuk kanë të drejta, kërkoi ndihmë nga organizata Bharatiya Muslim Mahila Andolan (BMMA). Kjo organizatë shpreson se Gjykata Supreme do ta ndalojë këtë praktikë, sidomos kur thuhet se duhet pritur disa muaj e tek atëherë mund të ndodhë ndarja.
Adeti islam lejon ndërmjetësimin nëse lajmërohen probleme në martesë, por kjo rrallë ndodhë. Ndaj, shumë politikanë kërkojnë ligje qytetare për të ndryshuar ato fetaret. Kundër janë veç krerët fetarë myslimanë që insistojnë në edukimin e meshkujve për të respektuar më shumë islamin.
Zakia Soman nga BMMA kërkon barazi të gjinive, sepse gratë pas ndarjes janë pa të ardhura ndaj varen nga të tjerët për të ushqyer familjen. Ajo thotë se fajtore nuk është feja po patriarkati nën maskën e religjionit.
