Luftë me zjarre, vërshime, tërmete dhe situata të tjera të rënda, është puna e përditshme e zjarrfikësve të Tetovës. Telegrafi Maqedoni ka qëndruar një ditë në Brigadën Zjarrfikëse të Tetovës, për t’u njohur nga afër me kushtet, si dhe vështirësitë që ata hasin në punë.
Drejtuesi i ri i Brigadës Zjarrfikëse të Tetovës Avni Ameti, deklaroi se edhe përkundër numri të ulët të zjarrfikëseve që posedojnë, nuk u mungon vullneti dhe dëshira për të ndihmuar qytetarët.
Ameti deklaroi se pas shumë kohësh më në fund është arritur marrëveshje me institucionet kompetente që zjarrfikësit e Tetovës të marrin kompensim financiar të merituar. Ai gjithashtu deklaroi se qytetarët gjithmonë i kanë dalë në ndihmë Brigadës Zjarrfikëse, sidomos mërgimtarët.
“Njësiti Territorial Kundër Zjarrit në Tetovë ka pasur disa lloje donacionesh nga bashkëqytetarët tanë. Gjithashtu vlen të përmendet se është hera e parë që pas 20 viteve u janë ndërruar gomat automjeteve që i posedojmë ne. Gjithashtu ka dy muaj që zjarrfikësit janë pajisur me rroga që i meritojnë”, tha mes tjerash Avni Ameti.
Ai gjithashtu na i prezantoi mjetet tjera me të cilat intervenojnë në aksidente trafiku, zjarre në ambiente të mbyllura, si dhe për largimin e gjarpërinjve.
