Deputetët, anëtarë të Komisionit për Buxhet dhe Financa, janë përpaslur me bordin e Agjencisë Kosovare të Privatizimit, për harxhimet e luksit.
E gjitha nisi pasi Hajzer Salihu, anëtar i bordit në AKP tha se kjo agjenci nuk bën harxhime luksi.
Në prezantim të raportit për vitin ai ka folur për mënyrën se si është shpenzuar buxheti i AKP-së.
“Ajo qe duhet te theksojmë është që AKP-ja është ndër organizatat nuk harxhon me luks buxhetin. Tek kategoria e mallrave dhe shërbimeve 740 mije euro. AKP-ja ka arritur të kursejë rreth 800 mijë euro nga kjo kategori. Arsyeja e kursimit janë uljet e shpenzimeve. Në shpenzimet kapitale janë paraparë 30 mijë euro dhe nga projekti i realizuar janë kursyer në këtë kategori 7 mijë euro”, ka thënë Salihu.
Hekuran Murati, deputeti i Lëvizjes Vetëvendosje, ka kundërshtuar qëndrimin e Salihut se “ka kursime në shpenzime të luksit”.
“Thatë që s’ka shpenzime të luksit megjithatë shihet që në raport me vitin paraprak keni pasur rritje pothuajse në të gjitha shpenzimet. Dhe kategoria me rritjen më të madhe është ajo për paga dhe mëditje. Paga mesatare del 1763 euro për punëtor, nuk e di a mund të flasim për evitim të luksit në këtë rast. Në raport shihet se AKP ka një borxh prej 86 mijë euro, a është shlyer ky borxh. Keni angazhuar 68 punonjës me kontratë mbi vepër a janë zhvillu procedurat e rekrutimit?”, tha Murati.
Por Salihu tha se diferenca e shpenzimeve për paga dhe mëditje në krahasim me vitin 2018 është bërë për shkak të rritjes së të punësuarve në administratë dhe kompletimit të bordit të AKP-së.
Ndërsa deputetja e Vetëvendosjes, Yllëza Hoti, ka pyetur përfaqësuesit e AKP-së se pse janë rritur shpenzimet për internet në këtë institucion.
“Te pjesa e shpenzimit për internet është rritje shumë e madhe prej vitit 2018, sa ka qenë rreth 2 mijë, në vitin 2019 janë harxhuar rreth 11 mijë euro”, ka thënë Hoti.
E drejtori menaxhues në AKP, Veton Tolaj, tha se për lidhjen e kontratës së shërbimeve të telekomunikacionit janë imponuar nga Agjencia Qendrore e Prokurimit.
“Me hyrje të operatorit që është përzgjedh nga AQP-ja është përzgjedhur Posta dhe janë ngritur çmimet. Para vitit 2019 ka qenë operator privat që është kontraktuar nga AKP. Ndërsa në vitin 2019, kemi pasur imponim nga AQP-ja, e cila i imponon të gjitha institucionet për këtë shërbim me çmimin që ata e kanë caktuar me kontratë”, ka thënë Tolaj.
