Anëtari i Kryesisë së Lëvizjes Vetëvendosje, Elvis Hoxha në një intervistë për RTV Ora komentoi vizitën e presidentes Vjosa Osmani në Shqipëri.
Hoxha tha se presidentja ka shtruar me vizitën e saj tre çështje shumë të rëndësishme në lidhje me marrëdhënien mes Shqipërisë dhe Kosovës. Sipas tij, nga kjo vizitë kryeministri Rama mori mesazhin se nuk mund ta copëtojë Shqipërinë.
Hoxha: Vjosa Osmani vjen pas një heshtje dhe thotë vetëm tre çështje shumë të thjeshta: Mos të sabotohet Rruga e Kombit me një tra privat, do të thotë që çështjen e bashkimit kombëtar ndërmjet dy shteteve të mos reduktohen në traun e një privati si Kastrati. E dyta ishte, nëse sot e kemi Gjykatën Speciale në shpinë për UÇK, për disa njerëz të shtabit të përgjithshëm që janë shumë të rëndësishëm simbolikisht dhe funksionalisht, duhet që Shqipëria të luajë rolin e vet. Të bëjë atë rezolutë minimale të njohjes së gjenocidit serb. E treta tha që minishengeni është bërë gabim. E përcaktoi edhe gabimin, që ai është bërë që në fillim.
Por çështja është që nuk po kuptohet nga kryeministri fare dhe nuk ke si ti thuash Kosovës që e ke facultative pjesëmarrjen në një marrëveshje që ka punë të domosdoshme me Vuçiç. Vjosa Osmani erdhi dhe tha që e ke gabim këtë çështje, sepse Kosova është Shqipëri për Shqipërinë, para se Serbia të jetë e tillë. Gjeopolitikisht, gjeostrategjikisht, por mbi të gjitha kombëtarisht dhe kushtetutshmërisht, Vjosa Osmani i kujtoi Ramës se nuk mund ta zvogëlosh Shqipërinë pafund për të bërë pazar me Serbinë. Ndryshoi krejt skemën politike. S’ka parë gjë akoma Edi Rama.