LDK-ja sot zgjedh kryetarin e ri, këto ishin premtimet e kandidatëve

Aktuale

LDK-ja sot zgjedh kryetarin e ri, këto ishin premtimet e kandidatëve

Më: 14 mars 2021 Në ora: 09:30
Foto ilustrim

Lidhja Demokratike e Kosovës të dielën pritet të zgjedhë kryetarin e ri, pas dorëheqjes së Isa Mustafës nga udhëheqja e partisë.

Në garë për kreun e LDK-së, kandidaturën e kanë shpallur katër kandidatë: dy nënkryetarët Lutfi Haziri dhe Anton Quni si dhe anëtarët e kryesisë, Lumir Abdixhiku dhe Besian Mustafa.

Por, sipas statusit të kësaj partie, që është themeluar më 1989, secili nga këta kandidatë, që zyrtarisht të hyjë në garë, i duhet që fillimisht të marrë aprovimin e 178 anëtarëve apo 50 për qind plus një të delegatëve të partisë.

Kjo parti ka 355 delegatë dhe ky kuvend, zyrtarët e LDK-së kanë thënë se do të mbahen duke respektuar masat kundër pandemisë së koronavirusit.

Mbajtja e këtij kuvendi të LDK-së, vjen pas zgjedhjeve të 14 shkurtit, ku LDK-ja regjistroi rezultat të dobët, duke fituar 12.73 për qind të votave, gjë që çoi në njoftimin e Mustafës për tërheqjen nga udhëheqja e partisë.

“Vota e qytetarëve është ajo që respektohet dhe në shenjë të respektimit të kësaj vote dhe të hapjes së rrugëve të mëtejshme për riorganizim të LDK-së, unë sot e kam njoftuar kryesinë se do ta thërras kuvendin e LDK-së për zgjedhjen e kryetarit të ri të LDK-së, në një periudhë shumë të shpejtë kohore”, deklaroi Mustafa më 15 mars, kur njoftoi se po tërhiqet nga kreu i LDK-së.

Premtimet e kandidatëve

Anëtari i kryesisë së LDK-së, njëherësh ministri në detyrë i Mbrojtjes, Anton Quni, ishte zyrtari i parë i kësaj partie, që publikisht bëri të ditur ambicien e tij për ta marrë timonin e partisë.

“Janë shumë arsye e faktorë pse kam vendosur t’i futem kësaj gare. Në zgjedhjet e fundit është shprehur mosbesim ndaj LDK-së. Ata që kanë dalë në Lëvizjen Vetëvendosje, brenda një kohe të shkurtër do t’i riktheja në shtëpinë e tyre”, ka deklaruar Quni, duke iu referuar largimit nga partia të Vjosa Osmanit.

Osmani, e cila kishte postin e nënkryetares së LDK-së, në qershor të vitit 2020, u shkarkua nga të gjitha postet partiake, pasi kishte shprehur kundërshtitë e saj për prishjen e koalicionit qeverisës me Lëvizjen Vetëvendosje si dhe ishte shprehur kundër ekzekutivit që pasoi, të udhëhequr nga Avdullah Hoti i LDK-së.

Në zgjedhjet e 14 shkurtit, Osmani, që ka formuar një iniciativë të re politike, garoi në kuadër të listës së LVV-së dhe doli kandidatja më e votuar, duke fituar mbi 300 mijë vota.

Për rikthimin e Osmanit, ka premtuar se do të punojë edhe Lutfi Haziri, nëse merr besimin për ta udhëhequr LDK-në. Ai ka theksuar se është e domosdoshme, që kjo parti të hapet.

“Do të angazhohem për një vlerësim të drejtë, reformë të bazuar në meritë, konkurrencë, vlerësim të rezultatit dhe hapje të domosdoshme për brezin evropian të LDK-së në vendimmarrje”, ka deklaruar Haziri, më 10 mars në Gjilan, komunë të cilën ai e udhëheq.

Lumir Abdixhiku, që në LDK u bashkua më 2017, gjatë shpalljes së kandidaturës për kryetar, ka vlerësuar se rezultati i zgjedhjeve të 14 shkurtit ishte “ndëshkim nga njerëzit tanë nga qytetarët e vendit tonë, nga të njëjtit që dikur na kishin dhënë besim.

“E rëndë është rënia, por më i pafalshëm do të mbetej mosreflektimi i thellë i yni në rrugëtimin tonë përpara. Ky rrugëtim kërkon ndryshim”, ka thënë Abdixhiku.

Ndërkaq, Besian Mustafa, i cili njëherësh është ministër në detyrë i Bujqësisë, ka premtuar se do të krijojë unitet brenda partisë.

“Do të sigurohem që LDK-ja do të ketë debat, diskutim dhe bashkëbisedim të hapur e të gjatë me secilin dashamir, votues e ish-votues dhe anëtarë e ish-anëtarë, ku së bashku do të ndërtojmë unitetin dhe komunikimin tonë të vazhdueshëm”, ka thënë Mustafa.

Kjo është hera e parë që një kryetar i LDK-së jep dorëheqje. Kjo parti është themeluar më 1989 dhe që atëherë ka pasur tre kryetarë: Ibrahim Rugovën, Fatmir Sejdiun dhe Isa Mustafën./REL

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat