Vetëm katër ditë pasi pala serbe-jugosllave kishte refuzuar të nënshkruante Marrëveshjen e Ramujesë për ndërprerjen e luftës në Kosovë, më 23 mars të vitit 1999 (22 vjet më parë), Kongresi Amerikan me anë të një rezolute autorizoi presidentin e atëhershëm të Shteteve të Bashkuara, Bill Clinton që të ndërmirren sulme ajrore kundër Federatës Jugosllave, përkatësisht ndaj caqeve ushtarake e policore të Serbisë dhe Malit të Zi.
Rezoluta për sulmet ajrore ishte inicuar nga senatori demokrat i Delaware, Joseph Biden, i cili tash është president i SHBA-së.
“Autorizohet Presidenti i Shteteve të Bashkuara për të kryer operacione ajrore ushtarake dhe sulme me raketa në bashkëpunim me aleatët tanë të NATO-s kundër Republikës Federale të Jugosllavisë (Serbi dhe Mali i Zi)”, thuhet në rezolutë.
Rezoluta e Kongresit amerikan që autorizoi presidentin Bill Clinton të nis sulmet ajrore ndaj Ushtrisë jugosllave
Pro kësaj rezolute kishin votuar 58 senatorë nga 100 prej tyre.
Bombardimi i Jugosllavisë nga NATO ishte operacioni ushtarak Organizatës së Traktatit të Atlantikut Verior (NATO) kundër Republikës Federale e Jugosllavisë gjatë Luftës së Kosovës. Kjo ishte hera e parë që organizata e përdorur forcën ushtarake pa miratimin e Këshillit të Sigurimit të OKB-së.
Sulmet ajrore zgjatën 78 ditë, nga 24 mars 1999 deri më 10 qershor 1999. Emri i koduar operacionit zyrtarisht nga NATO ishte “Operation Allied Force” (Operacioni Forcave Aleate).
