Në opinion po diskutohet një plan që thuhet të jetë i përpiluar nga Franca.
Ai parasheh autonomi në veri dhe ekstraterritorialitet të kishave serbe në këmbim të liberalizimit të vizave dhe njohjes së Kosovës nga pesë shtetet e BE-së.
Këtë plan nuk po e konsiderojnë si të vërtetë nga Komisioni për Punë të Jashtme dhe Diasporë.
Kryetari i tij, Haki Abazi, njëherit deputet i VV-së, në një prononcim të shkurtë e ka quajtur atë spekulim.
“Nuk kam parë diçka zyrtare në këtë drejtim, andaj mendoj që është spekulim”, u shpreh Abazi.
Abazi nuk pati ndonjë koment kur u pyet nëse pritet të ndodhë liberalizimi i vizave për Kosovën këtë vit.
“Jo s`kam ndonjë koment tash për tash. Më mirë është të pytet Ministria e Jashtme”, deklaroi Abazi.
Ndryshe, disa javë më parë dy “non-paper” që flitnin për një marrëveshje të mundshme midis Kosovës dhe Serbisë, njëri që thuhej të ishte slloven dhe tjetri franko-gjerman, trazuan opinionin publik.
I pari ai që u tha se ishte me origjinë sllovene, parashihte lëvizje të kufijve në Ballkanin Perëndimor dhe bashkim të Kosovës me Shqipërinë, kurse i dyti ai franko-gjerman, formimin e Asociacionit me kompetenca ekzekutive në komunat me shumicë serbe dhe autonomi të Kosovës së Veriut.
Shtetet, që u tha se janë autore të këtyre dokumenteve jozyrtare, mohuan diçka të tillë.
Së fundmi, pas Greqisë, Spanja është shteti i radhës që do të lëvizë drejt hapjes së një zyre ndërlidhëse në Prishtinë.