(E plotësuar 13:26) - Të gjithë librat e shkruar nga ish-presidenti i Kosovës, Ibrahim Rugova, po edhe librat që janë shkruar për të, artikuj e fotografi, do të mblidhen në bibliotekën presidenciale që do të mbajë emrin e tij.
Themelimi i kësaj biblioteke është iniciativë e presidentes së Kosovës, Vjosa Osmani, e cila sot ka nënshkruar marrëveshje bashkëpunimi me ministrin për Kulturë, Rini dhe Sport, Hajrulla Çeku.
Pas nënshkrimit të marrëveshjes, e para e shtetit, Vjosa Osmani, tha se kjo ide është e bazuar në modelin amerikan të ndërtimit të bibliotekave presidenciale.
Qëllimi i kësaj biblioteke presidenciale, e që do të mbajë emrin “Dr.Ibrahim Rugova”, tha se ka për qëllim që ta mbajë kujtesën tonë historike dhe shtetërore dhe në veçanti përpjekjet e gjata të popullit të Kosovës për të ndërtuar shtetin e vet të pavarur dhe sovran.
Osmani: Do ta mbajë emrin e presidentit historik Dr.Ibrahim Rugova
“Është i bazuar në modelin amerikan të ndërtimit të bibliotekave presidenciale, kemi filluar me ndërtimin e bibliotekës presidenciale e cila do ta mbajë emrin e presidentit historik “Dr.Ibrahim Rugova” dhe e cila ka për qëllim që ta mbajë kujtesën tonë historike dhe shtetërore dhe në veçanti përpjekjet e gjata të popullit të Kosovës për të ndërtuar shtetin e vet të pavarur dhe sovran. Siç e përmenda kjo bazohet në modelin amerikan dhe rrjedhimisht kemi marrë përkrahje nga departamenti i shtetit amerikan, i cili do të dërgojë një ndër ekspertët më të njohur të saj për të ndihmuar që të kompletohet kjo bibliotekë duke u bazuar në këtë model”, tha ajo.
Presidentja Osmani deklaroi se Biblioteka Kombëtare, Muzeu, po edhe Arkiva Shtetërore, do të ndihmojnë që të punojnë së bashku për të zhvilluar fondet për bibliotekën.
Ajo tha se Biblioteka Kombëtare do ta ofrojë të gjithë bibliografinë që e kanë të Ibrahim Rugovës, siç janë librat, artikujt e tij, por edhe të gjithë librat e artikujt që janë shkruar për të.
Lajmi të rëndësishëm, Osmani e ka quajtur që familja e presidentit Rugova ka vendosur që të gjithë arkivin privat të presidentit t’ia vë në dispozicion kësaj biblioteke.
Sa i përket lokacionit se ku do të vendoset biblioteka presidenciale “Dr.Ibrahim Rugova”, Osmani tha se fillimisht do të vendoset në ndërtesën e Presidencës, e që më pas tha se së bashku me MKRS-në dhe ministritë e tjera të linjës, do të gjejnë një lokacion të përshtatshëm.
Osmani: Besoj shumë shpejt do ta gjejmë edhe lokacionin e përshtatshëm për bibliotekën
“Ekspertja që do të vijë nga Departamenti i Shtetit do të jetë në dispozicion të institucioneve tona në mënyrë që të mësojmë nga praktikat e atjeshme. Për momentin i gjithë fokusi është në mbledhjen e fondeve bibliotekare, arkivore, pra gjithçka që qoftë institucionet tjera edhe në këtë rast edhe familja Rugova dhe i falënderoj që kanë shprehur gatishmërinë, t’i mbledhim të gjitha ato materiale që tregojnë siç thash e tregojnë rrugën tonë të gjatë drejtë shtetit të pavarur sovran të Kosovës dhe memorien institucionale të këtyre përpjekjeve. Pra, në momentin që kemi fonde të mjaftueshme, besoj shumë shpejt do ta gjejmë edhe lokacionin e përshtatshëm për një bibliotekë të tillë, e cila do të jetë një vend ku edhe brezat e ardhshëm do të mund të mësojnë shumë për përpjekjet e gjata të gjithë qytetarëve të Kosovës të prirë në atë kohë deri më 2006 nga presidenti historik Ibrahim Rugova për shtetndërtim, paqe ndërtim po edhe procese të tjera jo të lehta në të cilat kemi kaluar”, tha ajo.
Ajo ka ftuar edhe të gjitha institucionet bibliotekare, arkivore dhe muzeore që të ofrojnë materiale siç janë librat, artikujt, revistat, fotografitë apo eksponantet e presidentit Rugova, sepse në këtë mënyrë Osmani u shpreh se do të ruhet kujtesa jonë dhe mbi të gjitha do të ruhen në kujtesën tonë historike përpjekjet e një populli të tërë për liri dhe pavarësi, e mbi të gjitha për shtetndërtim.
Në anën tjetër, ministri i Kulturës, Rinisë dhe Sportit, Hajrullah Çeku, tha se një bibliotekë e tillë përveç që nderon figurën e presidentit historik Ibrahim Rugova, nderon edhe Republikën e Kosovës.
Çeku: Duke e krijuar këtë institucion nderojmë edhe kombin, edhe Republikën e Kosovës
“Për t’ia shtuar Kosovës një institucion të ri të dijes, të shkencës dhe studimit. Besoj që duke e krijuar këtë institucion dhe duke e pagëzuar me emrin e presidentit historik Ibrahim Rugova, ne përveç që nderojmë figurën e tij nderojmë edhe kombin edhe Republikën e Kosovës. Si ministri e Kulturës bashkë me institucionet që janë pjesë e ministrisë, me Bibliotekën Kombëtare, Muzeun Kombëtar të Kosovës, Arkivin Shtetëror dhe të gjitha pjesët përbërëse do të jemi në dispozicion dhe do ta marrim me shumë seriozitet këtë detyrë kaq të rëndësishme dhe fisnike në të njëjtën kohë. Prandaj, përveç se kënaqësi ne ndjejmë edhe obligim që t’i përgjigjemi kësaj nisme dhe të bëhemi pjesë e bibliotekës presidenciale Ibrahim Rugova”, tha ai.
Osmani, u është përgjigjur edhe pyetjeve të gazetarëve sa i përket besueshmërisë së qytetarëve në institucionin e Presidentit të Kosovës.
Osmani: E vërteta është që po rritet besueshmëria e jo që po ulet
“Në këtë rast nuk është zyre partizanësh, e para. E dyta, më lejoni t’iu informoj që kurrë më herët nuk ka pasur bibliotekë presidenciale, prandaj është e çuditshme t’iu dëgjoj të thoni që janë shtuar bibliotekat kur në fakt është hera e parë që po themelohet. Një bibliotekë presidenciale gjë që mund të konfirmohet shumë lehtë dhe e treta, nuk është e vërtetë që po ulet besueshmëria në Zyrën e presidentit, sipas hulumtimit të fundit të financuar nga qeveria amerikane, ne këtë rast besoj ju si gazetarë do të duhej ta hulumtonit, tani Zyra e Presidentes së Republikës së Kosovës e ka nivelin më të lartë të besueshmërisë që e ka pasur që nga momenti i parë kur kanë filluar të bëhen hulumtime opinionesh. E vërteta është që po rritet besueshmëria e jo që po ulet, dhe e vërteta tjetër është që nuk ka pasur kurrë më herët bibliotekë presidenciale, është hera e parë që po ndërtohet nga institucionet tona”, tha Osmani.
Nënshkruhet marrëveshja për Bibliotekën “Ibrahim Rugova”, projektohet nga ekspertë amerikanë
Presidentja Vjosa Osmani dhe ministri i Kulturës, Rini dhe Sportit, Hajrulla Çeku, kanë nënshkruar marrëveshjen e bashkëpunimit për Bibliotekën Presidenciale “Ibrahim Rugova”.
Osmani me këtë rast tha se projekti do të realizohet nga ekspertë amerikanë, por që ende nuk është përcaktuar lokacioni i saktë.
Ajo madje Biblioteka Kombëtare do ta ofrojë bibliografinë e Rugovës, po ashtu edhe familja arkivin privat t’ia japë bibliotekës.
“Biblioteka do ta mbajë emrin Ibrahim Rugova dhe përpjekjet e gjata të popullit të Kosovës. Kjo bazohet në modelin amerikan dhe Amerika do të dërgojë ekspertët amerikan për ta përfunduar këtë bibliotekën dhe do të punojmë së bashku për zhvillimin e fondeve për bibliotekën”.
“Biblioteka Kombëtare do ta ofrojë bibliografinë e Ibrahim Rugovës dhe lajmi i rëndësishme është që familja Rugova arkivin privat t’ia japë bibliotekës që do të ndërtohet. Dhe për brezat që vijnë pas nesh të lëmë diçka të mirë”.
“Në fillim biblioteka do të jetë e vendosur në këtë ndërtesë për të vazhduar me ministrinë e Kulturës për të gjetur lokacion më të përshtatshëm prandaj edhe ekspertja do të jetë në dispozicion të institucioneve tona”.
“Për momentin është e rëndësishme mbledhja e fondeve. Në momentin që kemi fonde do ta gjejmë edh lokacionin e përshtatshme dhe brezat e ardhshëm do të kenë mundësi të mësojmë për presidentin Ibrahim Rugova. Nuk është zyrë partizanësh. Kurrë më herët s’ka pasur bibliotekën presidenciale. Nuk është e vërtetë që po ulet besueshmëria në zyrën e presidencës. Zyra e presidencës e ka besueshmërinë dhe po rritet besueshmëria”.
Ndërsa ministri Çeku tha se theksoi se realizimin e këtij projekti do ta marrin me seriozitet, raporton EO.
“…është kënaqësi për mua që jam këtu për të nënshkruara një memorandum, për t’ia shtuar Kosovës një institucion të dijes”.
“Unë mendoj që duke pagëzuar me emrin Rugova ne nderojmë kombin tonë. Do ta marrim këtë detyrë me seriozitet. Ne ndjejmë obligim në nismën e Bibliotekës presidenciale Ibrahim Rugova”.
