Dëshmitar kundër Thaçit e Veselit në Hagë? Ajazaj thotë se qytetarët s’i besojnë Lladrovcit për bisedën telefonike me ta

Aktuale

Dëshmitar kundër Thaçit e Veselit në Hagë? Ajazaj thotë se qytetarët s’i besojnë Lladrovcit për bisedën telefonike me ta

Më: 1 nëntor 2021 Në ora: 18:42
Driton Ajazaj

Kandidati për kryetar të Drenasit nga Demokratët për Drenasin, Driton Ajazaj, po vlerëson se kundërkandidati i tij, Ramiz Lladrovci, ka humbur besimin e qytetarëve në balotazh.

Ajazaj në Info Magazine deklaroi se Lladrovci po gënjen se e ka marrë mbështetjen e ish-presidentit të vendit, Hashim Thaçi, nëpërmjet një bisede telefonike nga Haga, njofton Klankosova.tv.

“Zotëri Lladrovci duke nuhatur humbjen që është duke e pritur më 14 nëntor është duke u orvatur dhe manipuluar”.

”Por, qytetarët nuk i besojnë më. Në asnjë mënyrë nuk besojmë se ka biseduar pasi ata [ish-krerët e UÇK-së që janë duke u gjykuar në Hagë] i kanë të kufizuara thirrjet telefonike – askush nuk i beson më Lladrovcit bile javë më parë e demantoi veten për këtë gjë”.

Ajazaj mes tjerash vlerëson se Lladrovci dyshohet të jetë dëshmitar kundër tyre në Hagë.

“Nuk i di raportet e tyre personale por përfolet se ky mund të jetë njëri nga dëshmitarët e tyre dhe për mua është e pakuptimtë që të thirret në biseda telefonike kur i dalin dhjetëra incizime ku ky mund të jetë dëshmitar potencial kundër tyre. Kam dëgjuar se më 19 nëntor 2019 ka qenë në Hagë në cilësinë e dëshmitarit por se çfarë dëshmitari duhet ta tregoj ai vetë. Nuk ka mundësi që të ketë kontakte – është mashtrim publik që po tenton ta bëjë por do të humbet”.

“Ky po e shfrytëzon gjendjen e tyre që padrejtësisht gjenden atje. Duke e ditur që regjioni ynë është i lidhur shumë më ish-krerët e UÇK-së ky [Lladrovci] po e shfrytëzon këtë por që do të humbet”, deklaroi Ajazaj.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat