Krasniqi uron Ditën e Alfabetit: Të shkruarit e shqipes themel i projektit për çlirim

Aktuale

Krasniqi uron Ditën e Alfabetit: Të shkruarit e shqipes themel i projektit për çlirim

Më: 22 nëntor 2021 Në ora: 11:52
Ilustrim

Kryetari i Partisë Demokratike të Kosovës, Memli Krasniqi ka përkujtuar Ditën e Alfabetit duke thënë se vetëdija e bartur përmes të shkruarit të gjuhës shqipe ka qenë themel i projektit kombëtar për çlirim.

I pari i PDK-së në një postim në rrjetin social Facebook theksoi se duke shënuar 22 nëntorin, Ditën e Alfabetit, nderohen të gjithë ata intelektualë e atdhetarë që tejkaluan barrierat e kohës, duke u bërë bashkë në thirrjen kombëtare për të vënë në dritë të shkruarit e gjuhës shqipe.

Ai ka folur edhe për Kongresin e Manastirit, si një kthesë vendimtare e përcaktuese për të ardhmen e shqiptarëve në rangun e qytetërimit botëror.

“Përkundër të gjitha pengesave dhe rrethanave të kohës, ata u mbajtën të bashkuar për të vendosur një mjet vendimtar në çlirimin e vetëdijes kombëtare, e cila vetëdije do të kulmonte edhe me çlirimin politik të kombit tonë.

Gjuha shqipe na ka mbajtur të bashkuar për shekuj dhe vetëdija e bartur përmes të shkruarit të gjuhës shqipe ka qenë themel i projektit kombëtar për çlirim. Çlirimi i ndërgjegjes sonë politike me shkrimin, leximin dhe artikulimin e vetëdijes, ka qenë parakusht për çlirimin politik, i cili ndonëse padrejtësisht tepër vonë, në Kosovë ka ndodhur vetëm një herë dhe atë në qershor të vitit 1999, pas luftës së lavdishme e të drejtë të Ushtrisë Çlirimtare të Kosovës dhe aleatëve tanë.

Urime Dita e Alfabetit”, ka thënë Krasniqi.

Alfabeti i gjuhës shqipe u unifikua 113 vjet më parë në Kongresin e Manastirit, i cili mbajti punimet mes 14-22 nëntorit të vitit 1908.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat