Skandaloze: Mbulohet shtatorja e Adem Jasharit në restorantin ku darkuan Rama e Vuçiq

Aktuale

Skandaloze: Mbulohet shtatorja e Adem Jasharit në restorantin ku darkuan Rama e Vuçiq

Më: 20 dhjetor 2021 Në ora: 23:11
Adem Jashari, pamje nga restoranti “Fish City”, ku darkuan Rama dhe Vuçiq

Shtatorja e Komandantit legjendar të Ushtrisë Çlirimtare të Kosovës (UÇK), e cila ka qenë e vendosur në restorantin “Fish City”, në Elbasan është mbuluar sonte.

Krejt kjo pasi aty për darkë sonte ishte presidenti i Serbisë, Aleksandër Vuçiq me ftesën e kryeministrit shqiptar, Edi Rama, me të cilin u tha se u diskutua për “Open Balkan”.

Kështu të paktën thotë opinionisti Kastriot Myftaraj.

Përmes një shkrimi në Facebook ai ka thënë se Rama është përkujdesur që Vuçiqi të mos i mbesë ndonjë halë në fyt kur sheh shtatoren e Adem Jasharit.

“Me rastin e vajtjes së Presidentit të Serbisë Vuçiç në “Fish City” në Elbasan, sipas agjendës së përcaktuar nga mikpritësi i tij Kryeministri Rama për vizitën e tij është marrë çdo masë që mikut të shquar nga Beogradi të mos i ngecë në fyt ndonjë “halë” dhe ta shijojë plotësisht peshkun e zgjedhur të oligarkut Gjergj Luca, pronarit të “Fish City”, shkruan ai.

“Për të mos shqetësuar Vuçiçin është mbuluar shtatorja e Adem Jasharit, e cila gjendet në këtë resort”.

Ai thotë se kjo shtatore u ndërtua për të tërhequr kosovarët.

“Është fjala për atë shtatoren për të cilën oligarku Luca me shumë emocion i kërkoi Albin Kurtit kur këtë e shpuri Edi Rama në resortin e Lucës, që të shkonin dhe ta shikonin. Por meqenëse oligarku Luca e ka ngritur këtë shtatore për të joshur klientë nga Kosova në resortin e tij, ai pa ngurim e mbuloi atë kur ia kërkoi miku i tij Edi Rama”.

“Meqenëse është parashikuar që Vuçiç të bëjë edhe një shëtitje nëpër resort për të parë këtë “mrekulli” kuptohet se shtatorja e Adem Jasharit do të ishte një e papritur e pakëndshme për të”, shkruan më tutje ai.

Gjatë shkrimit të tij ai përmendi edhe si çka shërbente Vuçiqi në kohën kur u vra Adem Jashari e familja e tij.

“Meqenëse Vuçiç ka qenë Ministër i Informacionit në 1998 kur u vranë Adem Jasharit dhe njerëzit e tij në Masakrën e Prekazit, atij me siguri do t’ i shijojë më shumë darka sepse mendon që kështu ka mposhtur për herë të dytë Adem Jasharin”.

Ndërkohë, Myftaraj pati një koment edhe për mos pjesëmarrjen e Lulzim Bashës në protestën e organizuar sot kundër Vuçiqit.

“I vetëshpalluri nipi i Drenicës, Lulzim Basha, i cili nuk po organizon protestë me rastin e ardhjes së Vuçiç, a nuk duhet të kishte thënë së paku diçka për mbulimin e shtatores së Adem Jasharit nga Edi Rama?”.

E rreth orës 20:00 të mbrëmjes, eskortat e Presidentit serb Aleksandër Vuçiq dhe kryeministrit maqedonas Zoran Zaev janë parë teksa kanë mbërritur në Elbasan. Aty u pritën nga kryeministri Edi Rama, që kishte mbërritur më herët bashkë me ministret e tij.

Dy kryeministrat dhe presidenti patën darkë informale në Elbasan së bashku me delegacionet e tyre përpara një dite intensive që i pret nesër lidhur me “Open Balkan”. Çështje kjo që u pasua me protestë të udhëhequr nga Salih Berisha përpara kryeministrisë sot.

commentFirst article
Sot mund të lexoni Shfletoni kopertinat