Nuk ndalet shteti, konfiskon 58 kartela grafike për prodhimin e kriptovalutave në Shtime

Aktuale

Nuk ndalet shteti, konfiskon 58 kartela grafike për prodhimin e kriptovalutave në Shtime

Më: 12 janar 2022 Në ora: 18:13
Operacioni policor është zhvilluar në një shtëpi të pabanuar

Policia e Kosovës sot pasdite ka konfiskuar 58 kartela grafike për prodhimin e kriptovalutave, pa dokumentacion në një fshat të komunës së Shtime.

Operacioni policor është zhvilluar në një shtëpi të pabanuar, te një person i dyshuar A.G. i moshës madhore. Në këtë rast janë ftuar edhe një njësi e KEDS-it.

Për të gjitha këto veprime të Policisë Rajonale të Ferizajt është njoftuar Prokuroria Themelore e Ferizajt, për veprime tjera hetimore.

Kriptovaluta është para digjitale, e decentralizuar, e bazuar në teknologjinë “blockchain”. “Blockchain” është një libër i hapur, i shpërndarë, i cili regjistron transaksionet me shifra. Në praktikë, është disi si një libër shitblerjeje, që është i shpërndarë nëpër kompjuterë të pafundmë nëpër botë.

Ndryshe nga euroja apo dollari amerikan, nuk ekziston një autoritet qendror që menaxhon dhe ruan vlerën e një kriptovalute.

Këto detyra janë të shpërndara gjerësisht mes përdoruesve të një kriptovalute, nëpërmjet internetit.

Bitcoin ishte kriptovaluta e parë, e propozuar nga Satoshi Nakamoto, në një dokument të vitit 2008, të titulluar “Bitcoin: Sistem elektronik, pa ndërmjetësues, i parasë së gatshme”.

Prodhimi i kriptovalutave konsumon shume energji elektrike sepse përfshin kompjuterë që bëjnë kalkulime për t’i verifikuar transaksionet.

Qeveria e Kosovës ka ndaluar në fillim të këtij muaji prodhimin e kriptovalutave.

Vendimi është marrë me rekomandimin e Komisionit Teknik për Masa Emergjente, i cili merret me çështjen e furnizimit me energji elektrike në Kosovë gjatë krizës energjetike.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat