Mustafi për referendumin serb: Shqiptarët e Kosovë Lindore janë të pa interesuar për ndryshimet kozmetike

Aktuale

Mustafi për referendumin serb: Shqiptarët e Kosovë Lindore janë të pa interesuar për ndryshimet kozmetike

Më: 17 janar 2022 Në ora: 19:11
Ragmi Mustafi

Kryetari i Këshillit Kombëtar Shqiptar në Luginën e Preshevës, Ragmi Mustafi, ka thënë se shqiptarët e Luginës ishin të pa interesuar për ndryshimet që kanë ndodhur në kushtetutën e Serbisë, me referendumin e djeshëm, duke i quajtur ato si ndryshime kozmetike.

“Shqiptarët e Luginës janë të pa interesuar për këto ndryshime kozmetike, sepse nuk e heq qoftë Kosovën nga kushtetuta, qoftë që krijon një hapësirë për të qenë më të barabartë e për ta definuar Serbinë si një shtet qytetar”, ka thënë Mustafi për Info Magazine.

Ai tha se shqiptarët atje kishin pritur ndryshime substanciale, e jo që Serbia prapë të prezatohej si shtet i shumicës dhe të linte në rend të dytë popujt jo shumicë.

“Shqiptarët e Luginës së Preshevës kanë pritur që të kishte ndryshime substanciale të kushtetutës dhe jo që kushtetuta edhe më tej të prezantonte Serbinë si shtet i shumicës duke përjashtuar popullin jo shumicë, përkatësisht duke i vendosur si qytetarë të rendit të dytë e aq më tepër këto ndryshime kushtetuese jo që krijohet hapësirë më e madhe për të ushtruar liri, drejtësi e barazi”, ka shtuar Mustafi.

Ai theksoi se moslejimi i referendumit në Kosovë ishte i drejtë.

Mustafi tha se paralajmërimet e presidentit e kryeministres së Serbisë janë të frikshme, ato, sipas tij, mund t’i përsërisin situatat e mëhershme që i shkaktonin serbët në Kosovë.

Ai tha se shpreson që tensionet e krijuara në mes Kosovës e Serbisë të mos kenë implikime te shqiptarët e Luginës, sepse atëherë, sipas tij, do të ishte shumë më lehtë të zbatohej çfarëdo politike fashiste.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat