Abazoviqi shpalos planin për qeveri të pakicës në Mal të Zi

Aktuale

Abazoviqi shpalos planin për qeveri të pakicës në Mal të Zi

Më: 18 janar 2022 Në ora: 13:04
Alon Ben-Meir Dritan Abazoviq

Lëvizja qytetare URA, president i të cilës është politikani shqiptar nga Ulqini, Dritan Abazoviq, ka përsëritur sot kërkesën për formimin e një qeverie të pakicës në Mal të Zi, pa prezencën e partive, si asaj Demokratike të Socialistëve dhe Frontit Demokratik.

Lëvizja Ura përmes një postimi në rrjetet sociale të martën, ka thënë se një qeveri e tillë do të niste me vendosmëri integrimin në BE, do të zhbllokonte institucionet, veçanërisht në gjyqësor, do të vazhdonte luftën kundër krimit e korrupsionit, do të siguronte rimëkëmbjen ekonomike dhe zbatimin e reformave dhe do të vazhdonte rritjen e pagave për qytetarët.

“Po ashtu do të mundësonte thithjen e investimeve të reja të huaja dhe fondeve të BE-së, të cilat tashmë janë ndalur për shkak të situatës së paqëndrueshme politike”, thuhet në njoftimin e URA-s në Facebook.

Ky propozim i URA-s vjen pas përplasjeve dhe mospajtimeve për shumëçka brenda partnerëve të koalicionit.

URA përfaqësohet me katër deputetë në Kuvendin e Malit të Zi, ndërkohë Abazoviq është zv.kryeministër i këtij vendi.

Në fakt, edhe dje koalicioni “Bardh e Zi”, ku subjekti më i madh politik është URA, propozoi një qeveri të pakicës. Pas kësaj, në disa qytete të Malit të Zi pati protesta të qeta me mesazhin “Mos e tjetërsoni vullnetin tonë”.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat