Rasti ku gruaja rrahu me shuplaka burrin, policia dhe spitali me deklarata kontradiktore

Aktuale

Rasti ku gruaja rrahu me shuplaka burrin, policia dhe spitali me deklarata kontradiktore

Më: 20 janar 2022 Në ora: 17:32
Pamje nga vendi i ngjarjes

Deklaratat e Drejtorit të Spitalit të Gjakovës, Ardian Isufit dhe e Policisë së Gjakovës për rastin ku një grua me probleme shëndetësore ka ushtruar dhunë ndaj burrit të saj, i cili është pjesërisht i palëvizshëm, janë kontradiktore mes vete.

Përderisa nga Policia e Gjakovës kanë thënë se për rastin janë njoftuar nga një video që është përcjellë në emailin e Policisë, Isufi thotë se rasti është proceduar sipas të gjitha rregullave.

Sipas tij, burri është ende duke u trajtuar në spital dhe gjendja e tij është e mirë.

“Rasti është proceduar sipas të gjitha rregullave. Gjatë kohës sa jam unë në këtë detyrë, s’ka pasur raste të tjera të tilla. Burri është ende në spital, por gjendja e tij është e mirë. Ndërsa gruaja është liruar, meqenëse ajo ka qenë vetëm përcjellëse”, ka thënë Isufi.

Rastin e ka konfirmuar Drejtori i Policisë për Rajonin e Gjakovës, Lumni Graishta.

“Po, rasti është raportuar më datë 18.01.2022 por që dyshohet të ketë ndodhur më datë 14.01.2022 rreth orës 03:00.  Një videoincizim është pranuar në adresën zyrtare të PK-së ku një person i dyshuar (femër) shihet duke e goditur viktimën (burrë, pacient i shtruar në spitalin rajonal në Gjakovë). Pas identifikimit të personave në videoincizim, policia në Gjakovë ka arrestuar të dyshuarën dhe e njëjta me urdhër të prokurorit ndalohet për 48 orë por për shkak të probleme shëndetësore të natyrës emocionale, e njëjta vendoset në repartin e neuropsikiatrisë në spitalin rajonal në Gjakovë”, ka thënë Graishta.

Detaje të tjera rreth rastit ka dhënë zëdhënësi i Policisë për këtë rajon, Nysret Xhurkaj.

“Me datë 14.01. 2022 rreth orës 03:00 , e dyshuara kishte sulmuar fizikisht viktimën (burrin e saj), i cili është pjesërisht i pa lëvizshëm. Rasti ka ndodhur në repartin e neurologjisë në spitalin “Isa Grezda” – Gjakovë. Viktima ka pësuar lëndime trupore”, ka thënë Xhurkaj.

Ai ka bërë me dije se e njëjta është arrestuar, por se shkaku i problemeve shëndetësore të natyrës emocionale, e njëjta është dërguar në repartin e neuropsikiatrisë në spitalin rajonal në Gjakovë.

“Viktimës i është ofruar ndihma mjekësore, si dhe mbrojtësi i viktimave është njoftuar për rastin e ndodhur, po ashtu prezent ka qene dhe punëtori qendrës sociale. E dyshuara ( bashkëshortja) është shoqëruar në Stacionin policor, është intervistuar dhe në konsultim me prokurorin kujdestar, e njëjta mbahet në ndalim policor, por për shkak te gjendjes se saj mendore, me udhëzim te mjekut psikiatër, e njëjta është hospitalizuar në repartin e psikiatrisë, nën shoqërimin e zyrtarëve policor”, ka thënë Xhurkaj.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat