Shefi i grupit të asamblistëve të Lëvizjes Vetëvendosje, Gëzim Sveçla ka konfirmuar se asambleisti i VV-së në Prishtinë, Berat Lahu nuk është në mesin e të arrestuarve për aferën “Brezovica”.
Ai ka deklaruar se Lahu gjendet jashtë vendit për arsye shëndetësore dhe se nuk është në mesin e të arrestuarve në aksionin e sotëm të Policisë.
“Përmes mjeteve të informimit e morëm një informacion që është arrestuar por doli i pasaktë. Ajo çfarë mund të them është se Berat Lahu nuk është i arrestuar dhe për momentin është jashtë vendit. Asi këtë javë është jashtë Kosovës për arsye shëndetësore dhe personale. Kjo është e tëra çfarë unë kam informacione”, tha ai.
Madje Sveçla tregoi edhe për bisedën që e ka pasur sot me Lahun.
“Sot kemi kontaktuar pas atij lajmi dhe ai më ka treguar që është jashtë vendit dhe po vazhdon trajtimet e nevojshme që është duke i bërë që një kohë të gjatë”, tha ai.
Teksa u pyet se a ka informacione se ndaj Lahut është lëshuar fletarrest siç u raportua gjatë ditës, ai tha se këtë gjë nuk e dinë.
“Ai nuk është i arrestuar dhe kjo pjesë tjetër është punë e hetuesisë dhe e organeve kompetente. Nuk e di se kush është duke u kërkuar për t’u arrestuar, tha ai.
