Deputeti nga radhët e LVV, Enver Dugolli, i cili njëkohësisht është në Komisionin për Siguri dhe Mbrojtje të vendit, ka folur për hapat e radhës që po ndërmerren për ushtrinë e vendit.
Ai në një bashkëbisedim me “Bota sot”, u shpreh se vendi ynë po përballet çdo ditë me diçka të re nga Serbia dhe nevojiten kushte edhe më të duhura për ushtarët tanë.
Sipas tij, mbështetja e madhe buxhetore e Qeverisë për MM-në dhe FSK-në, kërkon vendosmëri dhe kreativitet për realizimin e pritjeve.
“Ne po punojmë me intensitet të madh që të plotësojmë kuadrin ligjor në mënyrë që të lehtësojmë rrugën në përmbushjen e objektivave të qeverisë dhe Ministrisë së Mbrojtjes për ngritjen dhe fuqizimin e FSK-së. Mbështetja e madhe buxhetore e Qeverisë për MM-në dhe FSK-në, kërkon vendosmëri dhe kreativitet për realizimin e pritjeve, prandaj në këtë kuadër edhe ne si Komision po mundohemi të jemi në të njëjtën vijë”, foli Dugolli për “Bota sot”.