Ish-kolonel Gashi: Kontributi i Kroacisë në luftën e Kosovës ishte i jashtëzakonshëm

Aktuale

Ish-kolonel Gashi: Kontributi i Kroacisë në luftën e Kosovës ishte i jashtëzakonshëm

Më: 26 maj 2022 Në ora: 20:52
Binak Gashi 

Në Rahovec po qëndron një grup i ish-luftëtarëve nga Kroacia, më saktësisht nga shoqata “Tigrat e Kroacisë”, të cilët erdhën për t’i vizituar miqtë e tyre me të cilët luftuan bashkë në luftën e fundit në Kosovë.

Ish-koloneli i UÇK-së Binak Gashi që ka marrë pjesë edhe në luftën e Kroacisë, ka treguar se shumica e kosovarëve që kanë luftuar në Kroaci e kanë të rregulluar statusin e veteranëve në këtë vend.

“Për momentin në Kroaci e kemi statusin që është duke u rregulluar, derisa një pjesë e madhe e kanë statusin e veteranëve në Kroaci të rregulluar. Shoqata jonë po mundohet që ta shfrytëzojë përvojën e tyre për të mirën e veteranëve të Kosovës”.

Ai, foli edhe për dallimet mes luftës së Kosovës dhe asaj të Kroacisë derisa ka qenë pjesëmarrës i të dyja luftërave ballkanike.

“Dallimi është shumë i madh, për arsye se UÇK-ja ka pasë shumë vështirësi. Kufiri shqiptaro-shqiptar i cili ka qenë kufi i hekurt dhe furnizimi me municion dhe logjistika ka qenë e vështirë të funksionojë, derisa në Kroaci ka qenë pak më e lehtë për shkak të furnizimit që është bërë më trena, kamionë dhe vija të ndryshme. Motivimi për ne shqiptarët, të dyja luftërat, ka qenë i njëjtë, sepse e kemi pasë moton që ‘kudo që jemi në luftë ta kemi një serb më pak’”.

Ish-koloneli Gashi thotë se kontributi i Kroacisë në luftën e UÇK-së ka qenë i jashtëzakonshëm.

“Kroacia ka qenë një nga shtetet që ka pasë kontribut të jashtëzakonshëm, sepse ka dhënë njerëz që kanë pasë përvojë luftarake në luftën atdhetare të Kroacisë të cilën përvojë e kanë dhënë edhe në luftën e Kosovës”.

Gashi është shprehur i pakënaqur me trajtimin e veteranëve të luftës së UÇK-së nga ana e institucioneve shtetërore.

“Jam shumë i indinjuar që Parlamenti i Kosovës, të cilin kemi luftuar ta bëjmë, nuk i mbron vlerat e UÇK-së. Nuk dua të futem në akuzat e rënda që janë bërë në Parlament ndaj ish-liderëve të UÇK-së, por nuk jam i kënaqur me arritjet e Kosovës. Besoj që jemi i vetmi vend në botë që s’i kemi të ruajtura me ligj vlerat e UÇK-së”.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat