​Tahiri demanton Kurtin: Miratimi i rregullores së Kuvendit, meritë e grupit punues

Aktuale

​Tahiri demanton Kurtin: Miratimi i rregullores së Kuvendit, meritë e grupit punues

Më: 9 gusht 2022 Në ora: 20:44
Besnik Tahiri

Shefi i Grupit Parlamentar të Aleancës për Ardhmërinë e Kosovës, Besnik Tahiri ka folur për rregulloren e punës së Kuvendit të Kosovës ku sipas tij kryeministri Albin Kurti po bën përpjekje për të përvetësuar meritat.

Në një postim në Facebook, Tahiri ka thënë se miratimi i rregullores së punës së Kuvendit është meritë e punës njëvjeçare e grupit punues.

“Miratimi i Rregullores së Punës së Kuvendit është meritë e drejtpërdrejtë e grupit punues që ka punuar më shumë se një vit, e i cili përbëhej me shumicë nga partitë opozitare, ekspertë të NDI-së dhe organizatave tjera të shoqërisë civile”, ka shkruar Tahiri.

Ai ka thënë se është pikërisht Kurti i cili e ka penguar dhe bllokuar miratimin e kësaj rregullore.

“Statusi i kryeministrit Kurti tregon dy elemente shumë të rrezikshme: e para, tendenca për të marrë merita që nuk i takojnë, për shkak se, nëse e ka një njëri që e ka bllokuar miratimin e kësaj rregullore, ka qenë vetë Kurti gjatë dhjetë vjetëve, i cili nuk ka dashur të mbështesë shumicën për të kaluar këtë rregullore. E dyta, ai e merr rolin e kryetarit të Kuvendit, i cili duke dashur ta ruajë konsensusin që e kemi pasur në grup punues, nuk ka publikuar dhe nuk ka marrë merita”, është shprehur ai.

Tahiri ka komentuar edhe deklarimet e Kurtit për luftë në një intervistë për mediat italiane.

“Nuk e di çka po mendon kryeministri, njëherë duke shpallë gjendje lufte, e tash duke u munduar të merr merita që nuk i takojnë dhe nuk janë të tija”, ka përfunduar Tahiri.

Ndryshe, rregullorja e re e Kuvendit të Kosovës ka hyrë në fuqi sot, pasi është publikuar në Gazetën Zyrtare. Kryeministri Kurti përmes një postimi në Facebook, ka thënë se me miratimin e Rregullores së re të Punës Kuvendi i Kosovës ka kaluar testin e demokracisë.

Rregullorja e re e Kuvendit u miratua me 81 vota dhe procesi i rishikimit për të ardhur deri te kjo rregullore daton që nga viti 2012.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat