Admirali i NATO-s, Stuart B. Munsch, i cili është komandant i Komandës së Forcave të Përbashkëta Aleate të NATO-s në Napoli, ka qëndruar për vizitë zyrtare të mërkurën në Kosovë.
Siç bëhet e ditur në njoftim, ai ka takuar komandantin e KFOR-it për të diskutuar rreth planeve dhe operacioneve të ardhshme për të ruajtur me paanshmëri ndaj të gjitha palëve një mjedis të sigurt në Kosovë në përputhje me Rezolutën 1244.
“Është diskutuar edhe ardhja e 700 trupave shtesë nga batalioni rezervë i thirrur në Kosovë nga NATO-ja për të normalizuar situatën dhe për të garantuar sigurinë, si dhe punësimin e mundshëm të një batalioni tjetër rezervë që është vendosur në gatishmëri të lartë”, thuhet në njoftimin e NATO-s.
Munsch ka vlerësuar veprimet e KFOR-it në parandalimin e lëndimeve dhe humbjes së jetëve gjatë protestave të dhunshme të 29 majit.
Ai ka takuar edhe ushtarët e KFOR-it nga Italia dhe Hungaria, të cilët u plagosën gjatë dhunës së ushtruar ndaj tyre nga protestuesit serbë më 29 maj në Zveçan, teksa po ushtronin misionin e tyre sipas mandatit të KFOR-it të Këshillit të Sigurimit të OKB-së për të ruajtur një mjedis të sigurt në Kosovë.
“Ai vlerësoi profesionalizmin, guximin dhe përmbajtjen e tyre në trajtimin e dhunës. Ai falënderoi gjithashtu kombet e Hungarisë dhe Italisë për ofrimin e ushtarëve të tillë të trajnuar mirë”, thuhet mes tjerash në njoftim.
Munsch ka takuar edhe ambasadorët e QUINT-it për t’u konsultuar lidhur me mbështetjen e tyre për një rikthim në negociata dhe për t’i dhënë fund dhunës.
Siç thuhet në njoftim, Admirali i NATO-s ka bërë thirrje që të gjitha palët, përfshirë edhe “palët që krijuan kushtet për dhunën e 29 majit”, të përmbahen nga vendime dhe veprime te mëtejshme të papërgjegjshme dhe në vend të kësaj të angazhohen në negociata diplomatike në mirëbesim për të përmirësuar raportet brenda kornizës së dialogut të lehtësuar nga BE-ja.
