Tensionet në veri, KFOR-i rrit praninë me trupa britanike

Aktuale

Tensionet në veri, KFOR-i rrit praninë me trupa britanike

Më: 1 tetor 2023 Në ora: 13:00
Trupat britanike në Kosovë

Përballë tensioneve të fundit në veri të Kosovës, pas sulmit terrorist të 24 shtatorit, NATO para pak ditësh mori vendim të rritë praninë e saj në Ballkanin Perëndimor.

Në një përgjigje për RTV Dukagjinin nga NATO kanë bërë të ditur se Këshilli i Atlantikut të Veriut ka autorizuar forca shtesë nga Mbretëria e Bashkuara, kështu duke rritur praninë e KFOR-it.

“Në përgjigje të tensioneve në maj, KFOR-i dislokoi rreth 500 trupa turke nga forca jonë operative rezervë për Ballkanin Perëndimor dhe një batalion shtesë i forcave rezervë është në gatishmërinë më të lartë. Batalioni turk është zëvendësuar me trupa nga Bullgaria dhe Greqia.

Dje, Këshilli i Atlantikut të Veriut autorizoi forca shtesë nga Mbretëria e Bashkuar, nëse është e nevojshme, për të adresuar situatën aktuale. Ne nuk komentojmë detaje specifike operacionale”, thuhet në përgjigjen  tyre.

“Në dritën e zhvillimeve të fundit, KFOR-i po rrit praninë dhe aktivitetin e tij në veri të Kosovës dhe në zonat përreth vijës kufitare për të siguruar që ai të vazhdojë të përmbushë mandatin e tij për të ofruar një mjedis të sigurt për të gjithë njerëzit që jetojnë në Kosovë”.

Më tej, ata kanë theksuar se mandati i  KFOR-it është i qartë dhe nuk përfshin zbatimin e ligjit dhe kjo i mbetet Policisë së Kosovës.

“Ne gjithmonë do të vazhdojmë të sigurohemi që komandanti ynë të ketë burimet dhe fleksibilitetin e nevojshëm që KFOR-i të përmbushë mandatin e tij. Ne jemi të gatshëm të bëjmë rregullime të mëtejshme në qëndrimin e KFOR-it sipas nevojës.

Mandati i KFOR-it në OKB është i qartë dhe nuk përfshin zbatimin e ligjit. Kjo mbetet një prerogativë ekskluzive e Policisë së Kosovës”.

Ndërkaq, ministri britanik për Çështje Evropiane, Leo Docherty, është shprehur i kënaqur që forcat e Mbretërisë së Bashkuar do t’i bashkëngjiten KFOR-it në Kosovë.

Ministri britanik Docherty ka thënë se kjo demonstron përkushtimin e tyre ndaj NATO-s dhe stabilitetit në Ballkanin Perëndimor.

Ai ka thënë se rruga e vetme drejt paqes në Kosovë është përmes dialogut.

“Ne kërkojmë qetësi dhe depërshkallëzim nga të gjitha anët. E vetmja rrugë e qëndrueshme drejt paqes në Kosovë është përmes dialogut”, ka shkruar ministri britanik për Çështje Evropiane, Leo Docherty në platformën “X”.

comment Për komente lëvizni më poshtë
Sot mund të lexoni Shfletoni kopertinat