Zhvillimet e fundit në kufi, largohen bllokadat e krijuara nga ekstremistët e maskuar serbë

Aktuale

Zhvillimet e fundit në kufi, largohen bllokadat e krijuara nga ekstremistët e maskuar serbë

Më: 7 shtator 2024 Në ora: 08:00 Përditësuar në ora: 17:12 më 07.09.2024
Pamje nga vendi i ngjarjes

Hapen pikat kufitare në Merdare dhe Bërnjak, Sveçla jep detaje të reja mbi bllokadat e ekstremistëve serbë të maskuar

Nga: A.M

Ministri i Punëve të Brendshme, Xhelal Sveçla ka njoftuar se është marrë vendimi për hapjen e pikave kufitare Merdare dhe Bërnjak.

Sveçla bëri të ditur se ky vendim erdhi pasi u larguan bllokadat e krijuara nga ekstremistë të maskuar serbë.

“Rend dhe ligj, paqe e siguri, cep më cep e në çdo kufi të Republikës tonë”, shkroi ndër të tjera Sveçla, përcjell “Bota sot”.

Postimi i plotë

Pas pranimit të njoftimeve se tashmë janë larguar bllokadat e krijuara nga ekstremistë të maskuar që kanë qenë të vendosura dje në territorin e Serbisë dhe duke parë se nuk ka ndonjë pengesë për qarkullim nga dhe drejt pikave kufitare të Republikës së Kosovës, morëm vendimin për hapjen për qarkullim të pikave kufitare Merdarë dhe Bërnjak.

Rend dhe ligj, paqe e siguri, cep më cep e në çdo kufi të Republikës tonë.

Serbia bllokon kufijtë në mënyrë selektive, Kosova mbyll 2 prej tyre në tërësi

Që nga ora 18:00 e ditës së djeshme, grupe ekstremistësh serbë bllokuan disa nga pikëkalimet kufitare me Kosovën nga ana e Serbisë.

Siç u raportua, në rrugët që çojnë nga Serbia për në Merdarë, Jarinjë dhe Bërnjak, serbë edhe të maskuar, nën shoqërinë e policisë serbe, kishin dalë afër kufijve duke mos lejuar kalimin e shtetasve me dokumente të Republikës së Kosovës, raporton Klankosova.tv.

Radomir Rojeviq, kryetar i Asociacionit të Qytetarëve të Qarkut Kosovë-Mitrovicë, i cili edhe ka organizuar këto bllokada, pati thënë se do të lejohen vetëm automjetet spitalore dhe qytetarët me dokumente të Serbisë – jo edhe ata me të Republikës së Kosovës.

Mbrëmë në orët e vona, një familje kosovare ishte nisur nga Spitali i Prishtinës në drejtim të Gjermanisë për ta dërguar fëmijën e tyre për trajtim.

Ata kishin kaluar kufirin e Kosovës, mirëpo nuk u lejuan të shkojnë tutje nga maskat serbe, duke u detyruar të kthehen mbrapsht.

Për këtë rast reaguan ministri i Brendshëm Xhelal Sveçla, dhe ministrja e Jashtme, Donika Gërvalla.

Ata akuzuan edhe presidentin serb, Alleksandar Vuçiq, se qëndron prapa këtyre bllokadave.

Gjithashtu, u kërkua ndërhyrja e bashkësisë ndërkombëtare për lirimin e kufijve.

Meqë nuk pati reagim e as veprime në këtë drejtim, Kosova u detyrua të mbyllte kufijtë në tërësi në mënyrë që qytetarët të mos ballafaqoheshin me personat e maskuar në Serbi.

Mëngjesin e sotëm, zëvendësdrejtori i Policisë për rajonin e veriut, Veton Elshani, njoftoi se qarkullimi i automjeteve në pikën kufitare të Jarinjës po zhvillohet pa probleme.

“Në Jarinje po qarkullojnë veturat, për momentin nuk ka asnjë problem”, tha Elshani.

Mirëpo, dy pikat tjera kufitare, ajo e Merdarës dhe e Bërnjakut, vazhdojnë të jenë të mbyllura në tërësi nga autoritetet e Kosovës.

Edhe pika kufitare e Kullës, mes Malit të Zi dhe Kosovës, është e hapur për qarkullim të automjeteve, ndonëse e njëjta ishte paralajmëruar se do të mbyllej.

Kërkesë e serbëve është largimi i të gjitha njësive policore të Republikës së Kosovës nga pjesa veriore e vendit, dhe që situatën e sigurisë ta marrë nën kontroll KFOR-i.

​Të rejat e fundit nga pikë-kalimi kufitar në Merdarë

Pika kufitare në Merdarë vazhdon të jetë e mbyllur dhe mos të ketë qarkullim të automjeteve që nga dje( e premte) në orët e mbrëmjes.

Gjatë qëndrimit të ekipit të Kp në Merdarë, disa qytetarë me veturat e tyre erdhën për të kaluar këtë pikë, porse u njoftuan nga policët kufitar se është e mbyllur.

Përveç kësaj pike, e mbyllur është edhe pika tjetër kufitare në Bërnjak.

Ndërkaq, zëvendësdrejtori i Policisë së Kosovës për rajonin e veriut, Veton Elshani kanë thënë se në Jarinje automjetet kanë filluar të qarkullojë porse nuk ka konfirmuar nëse bllokada është hequr.

Pas mbylljes së pesë zyrave të strukturave paralele në veri nga Policia e Kosovës me dyshimet për falsifikim me dokumente, Këshilli për Bllokada i Serbisë paralajmëroi bllokim të pikë-kalimeve kufitare.

Bllokimi i pikë-kalimeve nisi dje (e premte) në mbrëmje, derisa autoritetet e Kosovës i kanë bërë thirrje ndërkombëtarëve të reagojnë.

Hiqen bllokadat në Jarinje, qarkullimi vijon pa probleme

Në pikën kufitare në Jarinje është hequr bllokada për qytetarët me dokumente të Kosovës, dhe tani qarkullimi vijon pa probleme.

Kështu tha zëvendësdrejtori për rajonin e veriut, Veton Elshani.

“Në Jarinje po qarkullojnë veturat, për momentin nuk ka asnjë problem”, tha Elshani.

Ndërkaq, pikat kufitare në Merdarë dhe Bërnjak, vazhdojnë të jenë të mbyllura.

Situatë e qetë në pikat kufitare ndërmjet Kosovës dhe Serbisë

Ani pse pikat kufitare në Merdarë dhe Bërnjak janë mbyllur nga protestuesit serbë, si dhe në Jarinje vazhdon bllokada për qytetarët me dokumente të Kosovës, situata cilësohet të jetë e qetë.

Kështu të paktën tha zëvendësdrejtori i policisë për rajonin e veriut, Veton Elshani.

“Situata është e qetë, nuk ka pasur ndonjë incident”, tha Elshani.

Serbët po protestojnë mëtanë kufijve të Kosovës, pra në territorin e Serbisë, dhe kërkojnë që Policia e Kosovës të tërhiqet nga veriu, e KFOR-i ta marr në mbikëqyrje.

Pas bllokimit të pikave kufitare, ka reaguar dhe ministrja e Jashtme, Donika Gërvalla, e cila u ka bërë thirrje ndërkombëtarëve që të mos përshkallëzohet situate më tutje.

“Ne i bëjmë thirrje urgjentisht ShBA-së, Turqisë, Gjermanisë, Francës dhe NATO-s që të ndërhyjnë për të parandaluar Vuçiqin nga përshkallëzimi i mëtejshëm i situatës”, është shprehur Gërvalla.

Edhe ministri i Brendshëm, Xhelal Sveçla ka reaguar pas ndodhive të fundit në veri.

“Pas paralajmërimit të grupeve ekstremiste serbe për protesta sot pas orës 18:00, janë vërejtur grupe ekstremistësh të maskuar të cilët në prani të policisë së Serbisë, brenda territorit të Serbisë, kanë ndaluar veturat dhe legjitimuar udhëtarët. Para pak çastesh, një familjes e cila po udhëtonte për në Gjermani, i është pamundësuar vazhdimi i udhëtimit dhe është kthyer prapa me forcë. Kjo po ndodhë para syve të policisë së Serbisë, fakt ky që e bën atë bashkë fajtore. Këto akte fashiste ku serbët lejohen pavarësisht dokumentacioneve që posedojnë kurse shqiptarët pengohen pavarësisht dokumentacioneve që posedojnë, janë absolutisht të papranueshme për ne”, u shpreh Sveçla.

Zhvillimet e fundit/ ​Merdarja e Bërnjaku të mbyllura, ndërsa Jarinja e...

Qendra Kombëtare për Menaxhim Kufitar ka njoftuar se dy pikat kufitare mes Kosovës dhe Serbisë, Merdarja dhe Bërnjaku vazhdojnë të jenë të mbyllura.

Kurse, pika kufitare në Jarinje vazhdon të jetë e bllokuar për qytetarët me dokumente të Republikës së Kosovës.

Së pari u mbyll pika kufitare në Bërnjak, ku ministri i Punëve të Brendshme Xhelal Sveçla njoftoi se grupe ekstremistësh të maskuar në prani të policisë së Serbisë, brenda territorit të Serbisë, kanë ndaluar veturat dhe legjitimuar udhëtarët.

Derisa tregoi se një familje kosovare që po udhëtonte për në Gjermani është kthyer prapa me forcë.

Ndërsa, më vonë bëri të ditur se është mbyllur edhe pika-kufitare në Merdarë.

“Pas veprimeve të njëjta të ekstremistëve të maskuar serb brenda territorit të Serbisë, që po ndalojnë në mënyrë selektive e me qasje fashiste ndaj qytetarëve që duan të kalojnë tranzit përmes Serbisë dhe gjithë kjo para syve të autoriteteve të Serbisë, mbyllet edhe pika kufitare në Merdarë. Në mbrojtje të jetës dhe për sigurinë e të gjithë qytetarëve tanë, edhe kjo pikë si ajo në Bërnjak do të jetë e mbyllur deri në ndalim të veprimeve të tilla selektive e fashiste e normalizim të plotë të situatës”, ka shkruar mbrëmë ministri Sveçla.

Kryetari i së ashtuquajturit asociacion i qytetarëve të Qarkut të Mitrovicës për Kosovë, Rasha Rojeviq, ka njoftuar se bllokada do të organizohet nga shoqatat vendase të qytetarëve nga Kosova.

“Bllokada do të fillojë në orën 18:00 të 6 shtatorit dhe do të zgjasë derisa të tërhiqen forcat policore të Kosovës nga veriu i Kosovës. Gjithashtu kërkojmë që KFOR-i të merr kontrollin e veriut të Kosovës”, kishte thënë ai.

Sipas tij, bllokadat do të zgjasin derisa të plotësohen kërkesat e qytetarëve.

Të mërkurën, Ministria e Punëve të Jashtme dhe Diasporës e Kosovës (MPJD) e bëri thirrje shtetasve të Kosovës dhe mërgatës kosovare t’i shmangin pikëkalimet kufitare mes Kosovës dhe Serbisë gjatë udhëtimeve të tyre transit.

comment Për komente lëvizni më poshtë
Sot mund të lexoni Shfletoni kopertinat