Njohësit e punës së Kuvendit thonë se s’ka zgjedhje pa konstituim të Kuvendit

Aktuale

Njohësit e punës së Kuvendit thonë se s’ka zgjedhje pa konstituim të Kuvendit

Më: 21 prill 2025 Në ora: 20:35
Kuvendi i Kosovës

Tentimi i katërt, përfundoi pas vetëm disa minutash.

Kështu, Lëvizja Vetëvendosje të hënën, nuk e propozoi emrin e kandidates për kryetare të Kuvendit.

Kjo çoi në shtyrjen e seancës konstituive, për 48 orë të tjera.

E monitoruesit e punës të Kuvendit, thonë se vendi po shkon drejt një krize serioze kushtetuese e politike.

“Në fakt sot, për dallim prej seancës së pardjeshme kur kishim vendim të Kuvendit për të mos e votuar Haxhiun, kësaj here përkundër deklarimit të Konjufcës si përfaqësues i VV-së, nuk u konsumua fare procedura që përbën shkelje të obligimit që ka VV-ja për të propozuar kandidatin dhe që propozimi materializohet si i tillë vetëm kur vendoset me procedurë votimi dhe jo kur përmendet emri në foltore por që i njëjti nuk konsumohet. Kjo është hera e parë që VV nuk e ka konsumuar të drejtën e saj për të propozuar kandidatin e kryetarit të Kuvendit”, ka thënë Eugen Cakolli nga KDI.

Por, a mund të shkoj vendi në zgjedhje të reja, pa konstituimin e institucionit legjislativ?

“Pa zgjedhjen e kryetarit të Kuvendit nuk mund të kryejmë proces zgjedhor. Gjykata dhe normat tjera në fuqi e përcaktojnë që nëse qeveria nuk zgjidhet brenda 60 ditëve nga konstituimi i Kuvendit, atëherë vendi shkon në zgjedhje të parakohshme parlamentare”, shprehet Cakolli.

Ndërkaq, nga Demokracia Plus, thonë se deputeti më i moshuar, veproi në mënyrë arbitrare.

“Kryesuesi i seancës konstituive veproi në mënyrë arbitrare dhe në kundërshtim me obligimet kushtetuese duke e ndërprerë seancën pa lejuar zhvillimin e votimit. Votimi i deputetëve nuk mund të paragjykohet mbi bazën e deklarimeve në media. Kjo është përpjekje e qëllimit për të bllokuar konstituimin e Kuvendit”, ka thënë Albert Krasniqi.

Kuvendi pritet t’i vazhdojë tentativat për konstituim, të mërkurën në ora 10:00.

comment Për komente lëvizni më poshtë
Sot mund të lexoni Shfletoni kopertinat