Policia fillon ndryshimet në nivelin komandues në disa komuna

Aktuale

Policia fillon ndryshimet në nivelin komandues në disa komuna

Më: 10 korrik 2025 Në ora: 19:52
Foto ilustrim

Pas dyshimeve se 5 policë janë përfshirë në vdekjen e 27 vjeçarit, Agon Zejnullahu në Lipjan, kanë filluar ndryshimet në nivelin komandues në drejtorinë e stacionit policor  në këtë komunë.

I pari që dha dorëheqje morale është komandanti i stacionit, Argjend Gashi.

Kapiteni Gashi,  ka konfirmuar për Tëvë1 se ka dorëzuar dorëheqjen e tij nga kjo pozitë, në shenjë përgjegjësie morale pas zhvillimeve të fundit në lidhje me rastin.

“Kam dhënë dorëheqje në mënyrë morale. E kam dorëzuar sot te Drejtori i Përgjithshëm i Policisë së Kosovës, por ende nuk është konfirmuar. Kjo nuk lidhet vetëm me rastin në Lipjan, por edhe me arrestimin e zyrtarëve policorë. Pres që dorëheqja ime morale të aprovohet nga drejtori i përgjithshëm”, deklaroi ish-komandanti i Policisë së rajonit të Lipjanit.

E pranimin e dorëheqjes së kapitenit Gashi, e konfirmoi drejtori i përgjithshëm i Policisë së Kosovës, Gazmend Hoxha për Tëvë1.

Ndërkaq, Drejtoria për Informim e Policisë së Kosovës, përmes zëdhënësit Baki Kelani kanë konfirmuar se në pozitën e Komandantit të Stacionit Policor në Lipjan, është emëruar Kapiten Brahim Shatrolli.

“Pas rastit të fundit i cili ka ndodhur në Lipjan, komandanti i Stacionit Policor në Lipjan, Kapiten Argjend Gashi ka kërkuar lirim nga pozita e Komandantit të Stacionit dhe kërkesa e tij është aprovuar. Në pozitën e Komandantit të Stacionit Policor ne Lipjan, është emëruar Kapiten Brahim Shatrolli”, tha Kelani.

Burimet e televizionit bëjnë me dije se të enjten Drejtoria e Përgjithshme e Policisë së Kosovës ka mbajtur një takim të jashtëzakonshëm, ku pritet ndryshime të tjera komanduese në disa komuna, ditëve në vijim.

Eksperti i sigurisë, Avni Islami thotë se në raste të tilla, ekziston e drejta morale për dorëheqje megjithatë thotë që përgjegjësia për rastin nuk bie mbi supet e komandantit.

“Në raste të tilla, është e drejtë morale të jap dorëheqje sepse kemi parë edhe vende të tjera ku ndodhin raste të tilla, jep dorëheqje, sepse dorëheqja është morale. Ndërsa në aspektin ligjor përgjegjësia e komandantit të stacionit policor nuk bije mbi të sepse edhe përgjegjësia është individuale dhe një grupi të caktuar të policëve të cilët kanë marrë pjesë në neutralizimin dhe arrestimin e një personi. Dhe kësisoj askush nuk bartë përgjegjësitë e tjetrit, përgjegjësia është individuale”, tha Islami.

Gjykata Themelore në Prishtinë- Dega në Lipjan të mërkurën ia ka caktuar paraburgimin për një muaj rreshterit Ibrahim Nela dhe zyrtarëve policorë: Albian Retkoceri, Artidon Konxheli, Liridon Rrahmani dhe Endrit Beqiri.

Ata  dyshohen për vrasje nga pakujdesia të 27-vjeçarit Agon Zejnullahu në Lipjan.

comment Për komente lëvizni më poshtë
Sot mund të lexoni Shfletoni kopertinat