Kuvendi nuk konstituohet përsëri, megjithëse po soset afati i dhënë nga Kushtetuesja
Deputetët kanë dështuar për herë të 48-të të konstituojnë legjislaturën e nëntë. Tentimi i radhës i Lëvizjes Vetëvendosje për të formuar komisionin për votimin e fshehtë të kryeparlamentarit nuk mori përsëri mbështetjen e partive të tjera politike. Seanca u ndërpre dhe vazhdimi i saj do të bëhet më 19 korrik në orën 11:00, raporton KosovaPress.
Kësaj radhe në seancë nuk ishte i pranishëm as lideri i LVV-së, Albin Kurti, njëherësh kryeministër në detyrë, Albin Kurti, i cili gjendet në një seminar në Greqi.
Kryesuesi i seancës konstituive, Avni Dehari sërish ftoi partitë politike për të propozuar emrat e kandidatëve për Komisionin Ad-hoc për votim të fshehtë në zgjedhjen e kryetarit të Kuvendit, por as kësaj thirrje partitë e tjera në Kuvend nuk propozuan emrat, madje të njëjtat kërkuan që kryesuesi t’i kthehet rendit të ditës së dakorduar për votim të hapur.
Madje, në disa momente pati përplasje të ashpra ndërmjet deputetëve të partive që deri tani ishin në opozitë dhe kryesuesit të seancës, Avni Dehari.
Deputeti i PDK-së, Rashit Qalaj, pasi mori fjalën tha se PDK-ja si parti shtet-forumuese është e vetëdijshme se moti është dashur të ketë institucione të Kosovës.
Qalaj: Moti është dashur të kemi institucione
“PDK-ja si një parti shtet-formuese dhe shtet-ndërtuese është e vetëdijshme se është dashur bukur moti të kemi institucionet e Kosovës. Duke u bazuar se sot është dita e 89 që ne kemi dhënë betimin si deputet”, tha ai.
Por në këtë moment atij iu ndal fjala nga kryesuesi Dehari, pasi sipas tij debatin e ndalon Rregullorja e Kuvendit.
Dehari: Ndaleni mikrofonin
“Ju lutem regjia të ndal mikrofonin. S’ka nevojë për debat. Kështu e kërkon rregullorja”, tha ai.
Por në atë moment, deputeti i PDK-së shkoi te hapësira e kryesuesit duke insistuar të marrë sërish fjalën, derisa disa minuta foli edhe pa mikrofonin të ndezur.
Qalaj: Duhet të formohen institucionet
“Pavarësisht, unë po them se ne është dashur të kemi qysh moti institucione. Është hera e 48-të që po mblidhemi pa ndonjë rezultat. Të dashur qytetarë ne si PDK, duke ditur se qytetarët presin që të miratojmë ligje dhe duke ditur se vendi është pa institucione dhe pa grupe parlamentare, unë si përfaqësues i PDK-së kam dal këtu”, tha ai.
Por, kryesuesi Dehari kërkoi nga ai të liroi foltoren.
Dehari: Liroje foltoren
“Liroje foltoren”, theksoi ai.
Fjalën e mori edhe deputeti i LDK-së, Alban Zogaj, i cili kritikoi kryeministrin në detyrë, Albin Kurti, që sipas tij, në krizën më të thellë politike dhe ekonomike në Kosovë shkon në seminare në Greqi.
Zogaj: Kosova në krizë politike dhe ekonomike, Kurti në seminare në Greqi
“Vendi është në krizën më të thellë politike dhe ekonomike. Kurse deputeti Kurti është në seminare”, tha ai.
Ndërkaq, Time Kadrijaj nga AAK-ja duke ironizuar tha se partia e saj e ka emrin për komisionin për votim të fshehtë të kryeparlamentarit, mirëpo që sot nuk është në seancë, por në Greqi.
Kadrijaj: AAK-ja e ka kandidatin, mirëpo është në pushime në Greqi
“AAK-ja e ka kandidatin, por sot paska shkuar në pushime në Greqi dhe është e pamundshme”, theksoi ajo.
Pro votimit të komisionit për votim të fshehtë të kryekuvendarit votuan vetëm 51 deputetë.