Para delegatëve të Partisë Demokratike të Kosovës, në Konventën e Përgjithshme pritet të paraqitet vetëm kandidatura për kryetar e Bedri Hamzës. Deri tani para nisjes së konventës zyrtarë të PDK-së, thonë se nuk ka kandidatur tjetër për kryetar.
Kryetari i Partisë Demokratike të Kosovës, Memli Krasniqi, ka njoftuar dorëheqjen nga pozita e të parit të PDK-së gjatë Konventës së 12-të të partisë, ku do të zgjidhet pasuesi i tij. Para delegatëve, ai e cilësoi këtë detyrë si “nderin më të madh” të jetës së tij politike.
Krasniqi, i cili qëndroi 4 vjet e 4 muaj në krye të PDK-së, falënderoi delegatët për besimin e dhënë në një periudhë që e përshkroi si ndër më sfidueset në historinë e partisë.
“Udhëtimi im si Kryetar filloi këtu dhe po përmbyllet këtu. Në të njëjtën skenë. Para të njëjtëve njerëz. Me të njëjtën dashuri për këtë parti dhe këtë vend... Sot largohem nga detyra me mirënjohje, me krenari, me paqe”, u shpreh ai, njofton zyra për informim e PDK-së.
Duke argumentuar arsyet e largimit, Krasniqi tha se PDK ka nevojë për “energji të re” dhe për një kryetar që njëkohësisht do të jetë kandidat për kryeministër në zgjedhjet e ardhshme nacionale.
“PDK ka nevojë për një momentum të ri, për një kapitull të ri. Nuk po largohem prej lodhjes apo zhgënjimit. Po e bëj këtë nga përgjegjësia… sepse besoj që shtëpia jonë është mjaftueshëm e fortë për t’u ngritur në lartësi të reja”, tha ai, duke shtuar se partinë po e lë “më të fortë se sa e kishte gjetur”.
Krasniqi përmendi me krenari arritjet gjatë mandatit të tij, duke theksuar ringritjen e PDK-së në skenën politike me fitore në disa komuna kyçe, me rritjen e besimit të qytetarëve dhe rikthimin në rolin e forcës kryesore opozitare.
“Kur mora drejtimin e partisë, PDK gjendej në një udhëkryq… Por së bashku, gur mbi gur, ditë pas dite, ne e ringritëm PDK-në”, tha ai.
Në fund, ai kujtoi edhe rrugëtimin e tij prej më shumë se 20 vitesh brenda PDK-së, duke nënvizuar se ishte “nder historik” të ishte një nga nënshkruesit e Deklaratës së Pavarësisë së Kosovës dhe të udhëhiqte partinë e “krenarisë kombëtare”, siç e quajti ai, thuhet tutje në këtë komunikatë.
Konventa e 12-të e PDK-së po vazhdon me procesin e zgjedhjes së kryetarit të ri të partisë.
-------
Nënkryetari i PDK-së, njëherësh kryetar i komunës së Prizrenit, Shaqir Totaj, tha se momentalisht ka vetëm një kandidatur për kryetar të PDK-së, derisa theksoi se zgjidhja më e mirë për PDK-në, është zgjedhja e Bedri Hamzës për kryetar.
Totaj: Bedri Hamza zgjedhja e duhur
“Nuk mendoj se ka pasur nevojë të shtyhet Konventa, meqenëse kemi veç një kandidat mendoj se ai do të zgjidhet dhe është zgjidhja e duhur….Me sa unë jam i njoftuar nuk është dikush që ka aplikuar përveç Bedri Hamzës”, tha ai.
Në anën tjetër, ish-deputeti i PDK-së, Xhavit Haliti, tha se rregullat janë strikte që brenda Konventës së PDK-së të paraqitet kandidatura e Enver Hoxhajt, teksa shtoi se i njëjti nuk ia ka kërkuar nënshkrimin atij për ta shpallur kandidaturën për kryetar.
Haliti: “Është krejtësisht normale në demokraci me pas shumë pretendime me u bo kryetar të partisë. Rregullat janë strikte dhe duhet me u zbatuar dhe tani të shohim si po zhvillohet mbledhja…Janë ca rregulla që ia pamundësojnë dikujt me hy sipas statutit. Duhet me i pas nënshkrimet e delegatëve dhe me paraqitë kandidaturën pesë ditë përpara. Nuk e di mua jo”, tha ai.