Krasniqi uron legjislaturën e re, thekson rëndësinë e mbrojtjes së çlirimtarëve e unitetit institucional

Aktuale

Krasniqi uron legjislaturën e re, thekson rëndësinë e mbrojtjes së çlirimtarëve e unitetit institucional

Më: 11 shkurt 2026 Në ora: 19:18
Ish-kryetari i Partisë Demokratike të Kosovës Memli Krasniqi

Ish-kryetari i Partisë Demokratike të Kosovës Memli Krasniqi, ka uruar konstituimin e legjislaturës së dhjetë të Kuvendit të Republikës së Kosovës.

Ai u ka uruar deputetëve të zgjedhur punë të mbarë dhe kurajo për të marrë vendime në interes të qytetarëve dhe të shtetit.

“Duhet të theksoj veçanërisht deputetët e Partisë Demokratike të Kosovës, duke i uruar që ta përfaqësojnë me dinjitet besimin e qytetarëve, të jenë zë i fuqishëm i interesit shtetëror dhe gardianë të Kushtetutës në çdo rrethanë”, tha Krasniqi. Ai po ashtu theksoi rëndësinë e mbrojtjes dinjitoze dhe të unifikuar për çlirimtarët e Kosovës, duke përmendur fazën finale të procesit gjyqësor në Hagë.

“Në këtë kohë sfidash, përfshirë fazën finale të procesit gjyqësor në Hagë, është detyrë institucionale dhe kombëtare e të gjithëve që të sigurojmë mbrojtje dinjitoze dhe qasje të unifikuar në përkrahje të çlirimtarëve tanë, në përputhje me standardet ndërkombëtare të drejtësisë. Kosova është më e fortë kur institucionet e saj veprojnë me maturi, unitet dhe përgjegjësi. Suksese në këtë mandat të ri, për Kosovën, për qytetarët dhe për të ardhmen tonë euroatlantike”, shkroi Krasniqi. 

comment Për komente lëvizni më poshtë
Sot mund të lexoni Shfletoni kopertinat