Gjykata Supreme: Pretendimet për vonesa në rastet e paraburgimit janë të pavërteta

Aktuale

Gjykata Supreme: Pretendimet për vonesa në rastet e paraburgimit janë të pavërteta

Më: 25 maj 2026 Në ora: 20:39
Foto ilustrim

Gjykata Supreme e Kosovës ka reaguar ndaj deklarimeve të Odës së Avokatëve të Kosovës lidhur me pretendimet për vonesa në trajtimin e rasteve të paraburgimit, duke shprehur keqardhje për mënyrën e ngritjes së këtyre shqetësimeve, transmeton IndeksOnline.

Në sqarimin për opinionin publik, Gjykata Supreme thekson se pas verifikimeve të brendshme, pretendimet për vonesa sistematike në shqyrtimin e paraburgimeve rezultojnë të pavërteta.

Sipas Gjykatës, çështjet që lidhen me caktimin apo vazhdimin e masës së paraburgimit trajtohen me urgjencë dhe prioritet të lartë, brenda afateve të përcaktuara me Kodin e Procedurës Penale dhe standardet ndërkombëtare për të drejtat e njeriut.

Reagimi i plotë:

Kundër-Reagim dhe sqarim për opinionin publik lidhur me pretendimet e Odës së Avokatëve për vonesa në çështjet e paraburgimit

Prishtinë, 25 maj 2026 – Gjykata Supreme e Kosovës shpreh keqardhje të thellë për mënyrën e reagimit të Odës së Avokatëve të Kosovës, për kinse vonesa në trajtimin e rasteve të paraburgimit nga Gjykata Supreme.

Gjykata Supreme, sqaron opinionin publik se, pas verifikimeve të kryera, pretendimet për vonesa sistematike në shqyrtimin e paraburgimeve, rezultojnë të pavërteta.

Çështjet që kanë të bëjnë me caktimin apo vazhdimin e masës së paraburgimit trajtohen me urgjencë dhe prioritet të lartë dhe shqyrtohen brenda afateve të përcaktuara me Kodin e Procedurës Penale, si dhe në përputhje me standardet dhe dispozitat ndërkombëtare që garantojnë mbrojtjen e lirisë personale dhe procesin e rregullt ligjor.

Gjykata Supreme mbetet e përkushtuar që në çdo rast të respektohen afatet ligjore dhe të sigurohet trajtim efikas i mjeteve juridike në çështjet e paraburgimit, duke pasur parasysh ndjeshmërinë dhe rëndësinë që këto raste kanë për të drejtat themelore të qytetarëve.

Nëse Oda e Avokatëve të Kosovës i referohet ndonjë rasti konkret, ku pretendohet se ka pasur tejkalim të afateve ligjore apo vonesa të pajustifikuara, ftohet që t’i adresojë të dhënat tek Kryetari i Gjykatës.

Gjykata Supreme është e hapur për bashkëpunim dhe komunikim profesional me të gjithë akterët e sistemit të drejtësisë, në funksion të garantimit të të drejtave dhe lirive themelore, forcimit të sundimit të ligjit dhe avancimit të administrimit të drejtësisë.

comment Për komente lëvizni më poshtë
Sot mund të lexoni Shfletoni kopertinat