LDK-ja merr vendimin përfundimtar për Sejdiun – ja çfarë vendosi Kryesia

Aktuale

LDK-ja merr vendimin përfundimtar për Sejdiun – ja çfarë vendosi Kryesia

Më: 1 shtator 2026 Në ora: 10:07 Përditësuar në ora: 16:43 më 01.09.2026
Kreu i LDK-së, Lumir Abdixhiku, duke prezantuar kandidatin për president, Bekim Sejdiu (i dyti nga ana e majtë e fotografisë).

Kica-Xhelili: Vota ime në parim do të jetë “për” Bekim Sejdiun, nëse pajtohet grupi parlamentar

Deputetja e Lidhjes Demokratike të Kosovës, Doarsa Kica-Xhelili, ka thënë se në parim do ta mbështesë kandidaturën e Bekim Sejdiut për president të Kosovës, nëse për këtë arrihet konsensus brenda grupit parlamentar të LDK-së,.

Kica-Xhelili tha se qëllimisht nuk ishte deklaruar më herët për kandidaturën, pasi Sejdiun e njeh prej vitesh në aspektin profesional, që nga koha kur ishte e angazhuar si avokate dhe kur kishte raste që kishin përfunduar në Gjykatën Kushtetuese.

“Unë qëllimisht ende nuk jam deklaruar, meqë kam një prapavijë, le të themi, pak më ndryshe në raport me këtë kandidaturë, jo në kuptimin e saj negativ, natyrisht, sepse unë zotëri Sejdiun e kam njohur përmes angazhimit tim si avokate dhe asokohe natyrisht që kemi pasur lëndë të cilat kanë shkuar në Gjykatën Kushtetuese. Dhe njerëzit e profesionit e kuptojnë që, pavarësisht që respektohen të gjitha vendimet e gjykatave në Kosovë, janë disa vendime që ne zakonisht i cilësojmë si pak më cilësore se të tjerat, në kuptimin se si ato analizohen dhe shkruhen”, tha ajo.

Ajo theksoi se pikërisht për shkak të njohjes së gjatë profesionale me Sejdiun, vlerësimi i saj për kandidaturën është edhe më i drejtpërdrejtë.

“Rrjedhimisht, unë jam pak subjektive, nëse mund të them ashtu, kur vjen puna tek vlerësimi i kësaj kandidature, sepse zotëri Sejdiun e njoh në aspektin profesional shumë më gjatë sesa tani që u shpërfaq si një emër i cili po propozohet nga dy parti politike. Rrjedhimisht, duke qenë që unë mendoja që, le të thoshim, kontributin tim ta bëj në atë aspekt profesional, meqë mendoj që disa nga ne duhet të fokusohemi në atë që ne mendojmë që e njohim më mirë, zotëri Sejdiu, sa i përket kësaj në kuptimin profesional, i përmbush të gjitha kushtet që të mbështetet”, u shpreh Kica-Xhelili.

Megjithatë, ajo tha se çështja kryesore mbetet arritja e një konsensusi politik, pasi për zgjedhjen e presidentit kërkohet shumicë dhe mbështetje e mjaftueshme në Kuvend.

“Tani se si do të arrijmë apo a do të arrijmë që ta arrijmë një konsensus politik, sepse ju e dini që në fund të ditës vota duhet të jetë unanime në rastin konkret nëse ne me të vërtetë prodhojmë një president të Republikës së Kosovës, vlerësoj që kemi shkaqe që ta shtyjmë përpara këtë kandidaturë. Vota ime në parim do të jetë ‘për’, në qoftë se dakordohet edhe grupi parlamentar, sepse, të them të drejtën, në kuptimin personal si do të jetë, nuk kam shumë vështirësi të gjej arsye të mos e votoj, të paktën parimisht. Kështu që mendimi im është ky dhe me shumë gjasa kjo do të jetë natyrisht nëse kemi konsensus si grup parlamentar, sepse ju e dini që duhet të ketë edhe shumicë në vendimmarrje”, tha ajo.

Anton Quni para mbledhjes së grupit parlamentar: E mbështes kandidaturën e Bekim Sejdiut për president

Deputeti i Lidhjes Demokratike të Kosovës, Anton Quni, para mbledhjes së grupit parlamentar ka deklaruar se e mbështet kandidaturën e Bekim Sejdiut për president të Kosovës, duke e vlerësuar atë si një figurë me bagazh të fuqishëm familjar dhe individual.

I pyetur për emrin e kandidatit konsensual dhe marrëveshjen mes LDK-së dhe Lëvizjes Vetëvendosje, Quni tha se për këtë çështje ishte deklaruar një ditë më parë përmes një publikimi në Facebook.

“Unë dje jam deklaruar, kam bërë një publikim në Facebook lidhur me propozimin që ka dalë si punë e përbashkët në mes të Lidhjes Demokratike të Kosovës edhe Lëvizjes Vetëvendosje, edhe kam mbështetur kandidaturën e zotëri Bekim Sejdiut për president të ardhshëm. Përveç atyre fakteve që numërohen nga liderët partiakë dhe shumë të tjerë që e njohin nga afër, unë mundem me shtu edhe disa çështje që unë i njoh, sepse afër meje, pasi që familjen Sejdiu e njoh që nga vitet ’90-ta, do me thënë nga kohërat shumë të vështira për Kosovën, për popullin shqiptar, kur familjarët e, në fakt, disa burra nga kjo familje Sejdiu kanë marrë pjesë në beteja të ndryshme për çlirimin e Kosovës, një ndër ta ka qenë edhe Arben Sejdiu, familjar shumë i afërt i Bekim Sejdiut”, tha Quni.

Ai tha se përmes Arben Sejdiut kishte krijuar përshtypjen për angazhimin e familjes Sejdiu ndër vite, duke e lidhur atë me periudhat më të vështira nëpër të cilat kishte kaluar Kosova.

“Nëpërmjet tij e kam krijuar edhe idenë apo përshtypjen për familjen Sejdiu, për tërë angazhimin e tyre atdhetar, patriotik në fazat e ndryshme kur kombi ynë dhe shteti ynë ka pasur vështirësi të mëdha. Në veçanti në kohën e rezistencës paqësore, do të thotë në përkrahjen e kauzës të ngritur nga presidenti historik Ibrahim Rugova, pastaj lufta për çlirimin e Kosovës dhe të gjitha angazhimet për ndërtimin e shtetit të Kosovës”, u shpreh deputeti i LDK-së.

Quni tha se për të nuk ka pasur dilema për kandidaturën e Sejdiut, duke theksuar se ai vjen me një përvojë dhe trashëgimi familjare që, sipas tij, e bën të denjë për këtë pozitë.

“Kurrë nuk kam pasur hamendjet më të vogla se në këtë rast nga kjo familje, do me thënë, vjen Bekim Sejdiu me një bagazh të fuqishëm familjar, po ashtu edhe individual. Kështu që nuk kam asnjë mëdyshje unë edhe shokët e mi, miqtë e mi, të cilët, do me thënë, edhe ato që nuk kanë informata të mjaftueshme, në momentin kur i kuptojnë këto fakte, pajtohen edhe janë përkrahës që në të ardhmen ne ta kemi Bekim Sejdiun për president të Kosovës”, tha Quni.

Ai u shpreh i bindur se zgjedhja e Sejdiut president do ta bënte krenar vendin.

“Jam më se i bindur që tërë kombin, tërë shtetin e Kosovës do ta bëjë krenar”, shtoi Anton Quni.

Osmani: Kandidatura e Bekim Sejdiut i bën nder Kosovës, LDK-ja nuk bie në kurthet e askujt

Ish-presidentja e Kosovës, Vjosa Osmani, ka folur për kandidaturën e profesor doktor Bekim Sejdiut për president të Republikës së Kosovës, duke thënë se ai i plotëson kriteret e përcaktuara nga grupi parlamentar i Lidhjes Demokratike të Kosovës.

Osmani tha se kandidatura e Sejdiut është në përputhje edhe me vendimin e Këshillit të LDK-së për t’i dhënë Kosovës institucione.

“Kandidatura e zotëri Sejdiut i bën nder gjithë Republikës së Kosovës. Jo vetëm që i plotëson të gjitha kriteret për të cilat ne patëm rënë dakord unanimisht në mbledhjen e fundit të grupit parlamentar, jo vetëm që e respekton vendimin e fundit të Këshillit të Lidhjes Demokratike të Kosovës që ka kërkuar nga kryetari i LDK-së që të bëjë çmos që Kosovës t’i japë institucione. Por, në të njëjtën kohë, i jep Kosovës një mundësi që të vazhdohen punë të rëndësishme në mbrojtjen e demokracisë. Po flas në kontekst të presidencës, po flas edhe për institucione të tjera, pra që të mbrohet demokracia, të mbrohet Kushtetuta, të fuqizohen aleancat”, tha Osmani.

Ajo vlerësoi edhe përvojën e Sejdiut, duke thënë se ajo ka qenë e jashtëzakonshme dhe gjithmonë në interes të Republikës së Kosovës.

“Përvoja e profesor doktor Bekim Sejdiut në të gjitha këto fusha ka qenë e jashtëzakonshme dhe gjithmonë, pa asnjë përjashtim të vetëm, ka qenë në interes të Republikës së Kosovës. Ne kemi bërë një kompromis, natyrisht, si Lidhje Demokratike e Kosovës, duke vendosur gjithmonë interesin e Kosovës para çdo interes individual apo partiak”, tha presidentja.

Osmani theksoi se tashmë përgjegjësia është edhe e deputetëve të Kuvendit të Kosovës për t’i dhënë vendit institucione stabile.

“Dhe tani secili deputet i Kuvendit të Kosovës, jo vetëm ne që jemi të LDK-së, kemi një përgjegjësi historike që vendit t’i japim institucione stabile. Që Kosova ta ketë një presidencë e cila do të vazhdojë hapat e mbrojtjes së aleancave, përfshirë aleancën strategjike me Shtetet e Bashkuara të Amerikës. Do të mbrojë Kushtetutën e Republikës së Kosovës dhe parimet e demokracisë”, u shpreh Osmani.

Ajo tha se është e bindur se Sejdiu është kandidat që mund t’i përmbushë këto përgjegjësi.

“Jam e bindur që profesor Bekim Sejdiu është një kandidat që e bën pikërisht këtë dhe, siç e thashë, i bën nder Kosovës në qoftë se zgjidhet president”, deklaroi Osmani.

Presidentja tha se LDK-ja e ka propozuar Sejdiun duke e konsideruar kandidaturën e tij si kontribut për vendin.

“Ne si LDK e kemi propozuar dhe mendoj që kemi bërë shumë mirë.

Siç e thashë, ky është një kontribut për Kosovën, një kontribut nëpërmjet të cilit e vendosim interesin e vendit tonë para gjithçka tjetër”, tha Osmani.

E pyetur nëse Sejdiu do ta ketë mbështetjen e nevojshme parlamentare, Osmani tha se dëshiron të jetë optimiste.

“Po kam dëshirë që të jem optimiste, sepse nuk ka asnjë arsye që të refuzohet. Përkundrazi, ka shumë arsye që të përkrahet. Ne e kemi tash takimin e grupit parlamentar dhe do të shohim se si do të shkojë ai takim”, tha ajo.

Osmani u pyet nëse kishte pasur diskutime me Sejdiun lidhur me shkeljet kushtetuese që, sipas saj, i ka bërë qeveria. Ajo tha se, nëse Sejdiu zgjidhet president, ai do të mund të japë vetë përgjigjet dhe qëndrimet e tij për këto çështje.

“Kur të zgjidhet presidenti i ardhshëm i Republikës së Kosovës, jam e bindur që me shumë dëshirë do t’u përgjigjet në këto pyetjet tuaja. Unë i kam mbajtur qëndrimet e mia në lidhje me temat e ndryshme. Ka çështje me të cilat jam pajtuar në atë periudhë, ka çështje me të cilat fare nuk jam pajtuar dhe për këtë gjë ju e dini, sepse jeni të njoftuar”, tha Osmani.

Ajo sqaroi se Sejdiu gjatë mandatit të saj ka pasur rol si ekspert i jashtëm i presidencës.

“Profesor Sejdiu ka qenë thjesht një ekspert i jashtëm që na ka këshilluar si presidencë për një gamë të gjerë çështjesh. Për relacionet me Shtetet e Bashkuara të Amerikës, që ka qenë një prej fushave kryesore ku ka kontribuar. Për çështje të tjera sa i përket integrimit euroatlantik. Për ballafaqimin me Serbinë – kjo ka qenë një prej punëve kryesore që i ka bërë”, deklaroi ish- presidentja.

Osmani tha se Sejdiu kishte ndihmuar presidencën në përgatitjen për përballjet me Serbinë.

“I ka ndihmuar presidencës gjithnjë që të përgatitet në ballafaqimet e shumta me Serbinë që i kemi pasur.Por edhe për çështje të shumta kushtetuese me të cilat jemi përballur gjatë mandatit tonë. Dhe ju i dini çfarë qëndrime i kemi mbajtur”, tha ajo.

Sipas Osmanit, në rast se zgjidhet president, Sejdiu do t’i ketë vlerësimet dhe qëndrimet e tij për çështjet e ndryshme.

“Mirëpo, si president i ardhshëm, pastaj unë jam e bindur që për secilën çështje ai do ta ketë vlerësimin e vet në radhë të parë dhe pastaj edhe qëndrimin publik aty ku është në interes të Kosovës që të dalë publikisht”, tha Osmani.

E pyetur për deklaratën e Armend Zemaj se kandidatura e Sejdiut është “një kurth i Albin Kurtit”, Osmani e hodhi poshtë këtë vlerësim.

“Jo, LDK-ja nuk bie në kurthet e kërkujt. Ne me krenarinë më të madhe e kemi propozuar profesor Bekim Sejdiun dhe të gjithë këtu brenda LDK-së e njohin, shumica dërmuese e njohin që një kohë shumë të gjatë. Një numër i madh i njerëzve që sot janë në grup parlamentar të LDK-së e njohin kontributin e tij që nga vitet ’90-ta, disa prej vitit 2007. Dhe emri i tij nuk është kurth, por është nder për Republikën e Kosovës”, tha Osmani.

Osmani u pyet edhe për procedurën që duhet ndjekur para se kandidatura të procedohet në Kuvend.

“Sepse kështu shkojnë procedurat. Gjithmonë kanë shkuar kështu brenda LDK-së: njëherë arrihet një dakordim në parim, sepse ne e dimë që pa pasur dakordim të grupit parlamentar nuk shkojmë në Kuvendin e Kosovës. Ne në grup parlamentar jemi pajtuar për të gjitha parimet, të cilat duhet, ose kriteret që duhet t’i plotësojë një kandidat”, tha ajo.

Ajo theksoi se për këtë çështje ka pasur vendim unanim brenda grupit parlamentar.

“Për këtë kemi pasur vendim unanim.Kemi pasur vendim unanim që të jetë kandidat jopartiak. Dhe tani që i plotëson të gjitha ato kritere dhe duke e ditur edhe kontributin që profesor Sejdiu e ka dhënë për shtetin e Republikës së Kosovës, unë jam e bindur që e meriton përkrahjen tonë”, deklaroi Osmani.

Osmani tha se LDK-ja nuk është e fokusuar te partitë e tjera, por te vendimi i saj për ta mbështetur Sejdiun.

“Nuk jemi në nevojë me menduar për parti të tjera. Ne mendojmë për përkrahjen që do t’ia japim si Lidhje Demokratike e Kosovës, sepse është në interesin e vendit tonë. Është po ashtu në interes të vendit tonë që të parandalohen zgjedhjet e reja nga të cilat nuk përfitojnë qytetarët. Dhe deri tani këto bllokada dhe ngërçe të njëpasnjëshme kanë krijuar dëme të shumta edhe përbrenda, por edhe në arenën ndërkombëtare për vendin tonë”, shtoi Osmani.

Rukiqi pas Kryesisë së LDK-së: Asnjë qëndrim kundër, pati lavdata për punën dhe integritetin e Sejdiut

Pas mbledhjes së Kryesisë së Lidhjes Demokratike të Kosovës (LDK), anëtari i Kryesisë së kësaj partie, Berat Rukiqi, ka dhënë detaje lidhur me diskutimet e zhvilluara gjatë takimit.

Rukiqi ka bërë të ditur se në mbledhjen e Kryesisë nuk ka pasur qëndrime kundër propozimit për president, ndërsa ka thënë se përkundrazi, janë shprehur vlerësime për punën dhe integritetin profesional, akademik dhe institucional të Bekim Sejdiut.

“Asnjë qëndrim kundër. Përkundrazi, pati lavdata për krejt punën dhe për krejt integritetin profesional, akademik dhe institucional të zotit Sejdiu”, tha Rukiqi.

I pyetur se a do të qëndrojnë në sallë të gjithë deputetët e LDK-së, Rukiqi u shpreh se kjo mbetet si qëndrim i grupit parlamentar.

“Kjo pastaj mbetet më mbas nga qëndrimet e grupit parlamentar që do të jenë tani pas pak minutash, ndoshta pas 30 minutash nga tani. Do të ketë mbledhje të grupit parlamentar dhe aty do të secili deputet e ka të drejtën dhe me lirinë e plotë t’i shprehë qëndrimet e veta. Por, normalisht, qëndrimi i Kryesisë ishte që të ketë një qëndrim të unifikuar të Lidhjes Demokratike të Kosovës në raport me këtë proces, i cili në fund të fundit nuk është personal, nuk është për shkak të një situate individuale të caktuar, por është proces për vendin, për me e ruajtur stabilitetin institucional.

Shihni pak a shumë secili ka pasur informacion për procesin e negociatave, por për shkak të diskrecionit të negociatave, kjo është mbajtur, domethënë, në diskrecionin e atij ose asaj ekipe negociuese e cila është autorizuar për me… për me pasur, domethënë, qëndrim. Normalisht, kështu ka qenë procesi edhe në të kaluarën. Domethënë, ka pasur negociata, është arritur një marrëveshje, pastaj është kthyer kryetari i partisë nëpër organe dhe ka marrë qëndrime.

Nëse nuk ka përkrahje të organeve të partisë, marrëveshja pastaj e humb kuptimin. Por kjo ka qenë procesi gjithmonë. Domethënë, unë me sa e mbaj mend edhe kur kam qenë jashtë politikës, në çdo rast, edhe… edhe partitë e tjera, në këtë rast edhe pala tjetër, edhe në të kaluarën palë të ndryshme negociuese, kanë negociuar, janë marrë vesh për diçka, pastaj janë kthyer prapa dhe kanë diskutuar emrin. Nuk ka diçka të panatyrshme këtu”, tha Rukiqi

Rukiqi ka theksuar se vendimi i Kryesisë lidhet me nevojën për një qëndrim të unifikuar të LDK-së për procesin, duke e cilësuar atë si një çështje që, sipas tij, shkon përtej situatave individuale dhe lidhet me ruajtjen e stabilitetit institucional.

Ndërkohë, ai ka bërë të ditur se qëndrimet përfundimtare të deputetëve të LDK-së do të diskutohen në mbledhjen e Grupit Parlamentar, ku secili deputet do të ketë mundësinë që të shprehë lirshëm qëndrimin e tij.

LDK-ja miraton marrëveshjen, mbështet Bekim Sejdiun për President

Nga: A.Sh

Kryesia e Lidhjes Demokratike të Kosovës ka miratuar unanimisht marrëveshjen politike për tejkalimin e krizës institucionale dhe ka mbështetur nominimin e profesor Bekim Sejdiut për President të Kosovës.

Në deklaratë, LDK-ja thekson se vendimi synon ruajtjen e stabilitetit institucional dhe shmangien e një krize të re politike. Kryesia u ka bërë thirrje deputetëve të Grupit Parlamentar të LDK-së që ta respektojnë vendimin e organeve të partisë gjatë procesit të votimit.

Sipas LDK-së, Sejdiu i plotëson kriteret për President për shkak të përvojës së tij si jurist, profesor universitar, diplomat dhe ish-gjyqtar i Gjykatës Kushtetuese.

Njoftimi i plotë:

DEKLARATË E KRYESISË SË LIDHJES DEMOKRATIKE TË KOSOVËS

Kryesia e Lidhjes Demokratike të Kosovës, në mbështetje të autorizimeve të dhëna nga Kuvendi i LDK-së dhe në ushtrim të përgjegjësive të saj statutare, shqyrtoi marrëveshjen politike për tejkalimin e krizës institucionale dhe për përmbylljen e procesit të zgjedhjes së Presidentit të Republikës së Kosovës.

Pas shqyrtimit, Kryesia, me unanimitet të plotë, miratoi marrëveshjen e arritur nga ekipi negociues i LDK-së; dhe kështu mbështeti nominimin e profesor Bekim Sejdiut për President të Republikës.

Ky vendim përfaqëson qëndrimin zyrtar dhe institucional të Lidhjes Demokratike të Kosovës. Ai është marrë në përputhje me mandatin e dhënë nga Kuvendi i LDK-së, me procedurat vendimmarrëse të partisë dhe me përgjegjësinë që LDK-ja ka marrë për garantimin e stabilitetit institucional dhe funksionimin e rregullt të rendit kushtetues.

Për LDK-në, ky proces nuk lidhet vetëm me zgjedhjen e një individi. Ai lidhet, para së gjithash, me ruajtjen e institucioneve të Republikës, shmangien e një krize të re politike dhe krijimin e kushteve për funksionim të qëndrueshëm institucional. Interesi i shtetit dhe detyrimi ndaj rendit kushtetues kanë qenë dhe mbeten orientimi themelor i veprimit tonë.

Në të njëjtën kohë, zgjedhja e Presidentit të Republikës kërkon një personalitet me integritet të dëshmuar, përgatitje të lartë profesionale dhe përvojë institucionale, i cili e kupton peshën kushtetuese të kësaj detyre dhe është në gjendje ta përfaqësojë unitetin e popullit.

Profesor Bekim Sejdiu i përmbush këto kritere. Si jurist, profesor universitar, diplomat dhe ish-gjyqtar i Gjykatës Kushtetuese, ai ka ndërtuar një karrierë të gjatë në shërbim të institucioneve të Kosovës. Përvoja e tij në fushën kushtetuese dhe në përfaqësimin diplomatik të vendit përbën garanci për ushtrimin e pavarur, të paanshëm dhe dinjitoz të detyrës së Presidentit.

Kryesia vlerëson se kandidatura e tij i shërben nevojës së vendit për një President që qëndron mbi ndarjet partiake, respekton me përpikëri Kushtetutën dhe përfaqëson Republikën me seriozitet brenda dhe jashtë vendit; me theks të veçantë në orientimin tonë euroatlantik.

Kryesia u bën thirrje deputetëve të Grupit Parlamentar të LDK-së që, gjatë procesit të votimit, të veprojnë në përputhje me autorizimet e Kuvendit të partisë, vendimin e Kryesisë dhe përgjegjësinë që mbajnë si përfaqësues të Lidhjes Demokratike të Kosovës.

Në çështjet që përcaktojnë stabilitetin dhe të ardhmen institucionale të vendit, përgjegjësia ndaj Republikës duhet të qëndrojë mbi çdo konsideratë tjetër. Respektimi i vendimeve të organeve legjitime të partisë është njëkohësisht respektim i mandatit politik, i besimit të anëtarësisë dhe i interesit shtetëror.

Lidhja Demokratike e Kosovës do të vazhdojë të veprojë me maturi, unitet dhe përgjegjësi, duke vendosur mbi të gjitha interesin e Republikës së Kosovës.

​Mblidhet Kryesia e LDK-së

Ka filluar mbledhja e Kryesisë së Lidhjes Demokratike të Kosovës, ku pritet të diskutohet për propozimin e Bekim Sejdiut për president.

LVV dhe LDK ranë dakord dje për emrin e Sejdiut për president konsensual.

Para nisjes së kryesisë disa prej anëtarëve të kryesisë thanë se grupi parlamentar i LDK-së do të jetë unik, përkundër që dje deputeti Avdullah Hoti tha se nuk e mbështet emrin e Sejdiut për president.

Pas mbledhjes së Kryesisë në selinë e LDK-së do të mblidhet Grupi Parlamentar i kësaj partie.

Lëvizja Vetëvendosje dhe Lidhja Demokratike e Kosovës janë pajtuar më 31 gusht për emrin e Bekim Sejdiut për president konsensual.

Sot LDK-ja pritet të diskutojë emrin e tij në strukturat e brendshme partiake, ndërkaq dje disa figura, përfshirë Avdullah Hotin, kanë dalë kundër emrit të Bekim Sejdiut për president.

Sipas LVV-së, për shkak të mosdakordimit për president, deri tani nuk është konstituar Kuvendi i Kosovës, pas zgjedhjeve parlamentare të 7 qershorit. 

Lushaku: Do ta mbështes kandidaturën e Bekim Sejdiut për president

Deputetja e LDK-së, Jehona Lushaku, ka folur para mbledhjes së Kryesisë së partisë, ku pritet të diskutohen zhvillimet politike në vend, konstituimi i Kuvendit dhe çështja e presidentit.

Lushaku tha se në mbledhjen e sotme do të diskutohet edhe emri i presidentit. “Kështu që sot do të kemi me u taku edhe me diskutuar bashkë edhe emrin e presidentit, edhe zhvillimet politike, edhe konstituimin e Kuvendit e të gjitha institucioneve sa më shpejt që është e mundur. Edhe kaq”, tha ajo.

E pyetur për zërat brenda LDK-së se disa deputetë nuk do ta votojnë presidentin dhe nëse emri i propozuar paraprakisht e ka marrë dritën e gjelbër nga secili deputet i LDK-së, Lushaku tha se kryetari dhe ekipi negociues kanë pasur autorizime të plota.

“Shiko, ne kemi autorizuar kryetarin edhe ekipin për me negociuar edhe ata kanë pasur autorizime të plota për të bërë edhe propozime edhe për t’i diskutuar emrat. Tani po diskutojmë edhe në një rreth edhe më të gjerë. Kështu që është proces krejt normal. Nuk mundet me qenë, si me thënë, për aq kohë sa nuk ka dakordësi, nuk ka mundësi si diskutohen shumë emra”, u shpreh ajo.

Lushaku tha se nuk e kishte ditur paraprakisht emrin e kandidatit para se ai të bëhej publik nga grupi parlamentar. “Jo, shiko, po të them që kur ka autorizime, ka disa persona që kanë autorizimet partiake edhe diskutojnë edhe negociojnë në emër të partisë. Edhe kështu ka qenë ky zhvillimi. Domethënë është gjithmonë normale kjo që ndodh”, tha deputetja.

Sa i përket kandidatit për president, Bekim Sejdiut, Lushaku deklaroi se ai e ka votën e saj.

 “Po. Domethënë, kandidati i propozuar është profesor fakulteti. Bekim Sejdiu është edhe kolegu im në Universitetin e Prishtinës prej kohësh. Është një person që ka bartur peshë edhe ka qenë pjesë e procesit të shtetformimit edhe pastaj edhe të zhvillimit të arsimit të lartë në Kosovë edhe të diplomacisë. Prandaj i bart të gjitha cilësitë të cilat mund t’i bartë një president. Mendoj që edhe nga aspekti i integritetit dhe unitetit qytetar është dikush që mund ta përfaqësojë Kosovën në mënyrë shumë të dinjitetshme, duke pasur parasysh të gjitha rrethanat politike, duke pasur parasysh që Kosova nuk ka institucione tash e dy vjet — institucione me fuqi të plota që bëjnë politikën e Kosovës. Është imediate që t’i kthehemi institucioneve dhe t’i sigurojmë qytetarëve një stabilitet politik dhe, si rrjedhojë, unë do ta mbështes këtë kandidaturë për t’i dhënë institucione vendit”, deklaroi Lushaku.

E pyetur nëse do të merren masa ndaj deputetëve që nuk marrin pjesë në votim apo nuk bëjnë kuorumin, Lushaku tha se vendimi i takon secilit deputet.

“Jo, është përgjegjësi e secilit deputet që të vendosë në fund të fundit veç e veç. Por ne s’duhet të harrojmë që ne jemi pjesë e një platforme politike dhe një partie politike që mbështesim aty. Por nuk është vetëm LDK-ja që duhet ta votojë apo jo. Kjo ka qenë një marrëveshje, si me thënë, në mes të LDK-së dhe VV-së, por kandidatura do të hidhet për gjithë Kuvendin e Kosovës. Pyetja është për të gjithë deputetët dhe për të gjitha partitë politike. Tani a sigurohet shumica varet edhe prej secilit deputet të Kosovës. Ne tek e fundit analizojmë secili dhe e kemi përgjegjësinë tonë për të dhënë llogaridhënie publike ndaj votuesve tanë pse e kemi votuar ose pse nuk e kemi votuar. E besoj që është edhe përgjegjësi individuale edhe karshi shtetit të Kosovës”, shtoi Lushaku.

----

Pas arritjes së marrëveshjes për kandidatin për president të Kosovës, partitë politike sot do të zhvillojnë konsultimet e brendshme para hapave të radhës.

Televizioni publik nga burimet e saj ka kuptuar se Lëvizja Vetëvendosje sot në orët e vona të pasdites do të mbajë takim të grupit parlamentar, ku pritet të diskutohet për hapat e ardhshëm pas dakordimit me Lidhjen Demokratike të Kosovës për kandidatin presidencial, Bekim Sejdiu.

Qëllimi i kësaj përpjekjeje është konstituimi i plotë i institucioneve dhe tejkalimi i ngërçit politik.

Edhe LDK-ja do të zhvillojë sot takime të brendshme. Në orën 14:00 do të mblidhet kryesia e partisë, ndërsa në orën 16:00 grupi parlamentar, për të shqyrtuar marrëveshjen e arritur dhe qëndrimet e mëtejshme.

Pas javësh negociatash, dakordimi për kandidaturën e Bekim Sejdiut shihet si një përpjekje për të hapur rrugën drejt funksionalizimit të institucioneve.

Përveç marrëveshjes së arritur me Lidhjen Demokratike të Kosovës për kandidatin për president, Lëvizja Vetëvendosje kishte bërë përpjekje për të përfshirë edhe partitë e tjera politike në këtë proces.

Mirëpo PDK ka insistuar se do të qëndroj në opozitë, ndërsa AAK ka refuzuar të marrë pjesë në takime pa u plotësuar 6 kushtet e saj.

comment Për komente lëvizni më poshtë
Sot mund të lexoni Shfletoni kopertinat