Në Shkollën e Oficerëve, në kuadër të Akademisë së Mbrojtjes, ka përfunduar “Stërvitja Ushtarake Bazë për Oficer”, e dedikuar për të rekrutuarit me kualifikime të veçanta specialistike në fushën e mjekësisë.
Pas përfundimit të trajnimit, pjesëmarrësit kanë bërë betimin ushtarak, duke u zotuar për përmbushjen me përgjegjësi dhe përkushtim të detyrave në shërbim të Forcës së Sigurisë së Kosovës.
Përfshirja e kuadrove të specializuara në radhët e FSK-së pritet të kontribuojë në forcimin e kapaciteteve profesionale të Forcës, veçanërisht në sektorin e shërbimit shëndetësor.
Përvoja dhe përgatitja profesionale e oficerëve të rinj në fushën e mjekësisë do të jenë pjesë e kapaciteteve që mbështesin gatishmërinë e FSK-së dhe përmbushjen e misionit të saj.
Me ceremoninë e betimit, oficerët e rinj janë rreshtuar në radhët e FSK-së, duke marrë përsipër përgjegjësitë e reja dhe duke u zotuar për shërbim ndaj Forcës dhe vendit.
Përfundimi i kësaj stërvitjeje shënon një tjetër hap në përgatitjen dhe integrimin e kuadrove profesionale në strukturat e FSK-së, me fokus të veçantë në forcimin e shërbimit shëndetësor.