Ligji për Specialen, Koci me mesazh të fortë për deputetët: Çka ndodh pas votimit?

Aktuale

Ligji për Specialen, Koci me mesazh të fortë për deputetët: Çka ndodh pas votimit?

Nga: A.M. Më: 5 tetor 2026 Në ora: 10:30
Avokati Arianit Koci

Avokati Arianit Koci ka reaguar për ndryshimet e propozuara në Ligjin për Dhomat e Specializuara, duke ngritur shqetësime lidhur me mënyrën se si synohet të bartet kontrolli i kushtetutshmërisë nga Dhoma Kushtetuese në Hagë te Gjykata Kushtetuese në Prishtinë.

Koci thekson se, ndonëse dëshiron të ndihmojë çlirimtarët, sipas tij kjo mund të mos jetë rruga e duhur, pasi neni 162 i Kushtetutës i njeh Dhomës në Hagë kompetencë ekskluzive për referimet kushtetuese që lidhen me Dhomat e Specializuara dhe Prokurorinë e Specializuar. Ai u ka kërkuar deputetëve të japin përgjigje të qarta se çfarë do të ndodhë pas votimit dhe si do të zbatohen ndryshimet e propozuara, përcjell “Bota sot”.

Reagimi i plotë

Edhe unë dua me iu ndihmu çlirimtarëve. Por nuk besoj se kjo është mënyra e duhur.

Sipas propozimit të bërë publik, kontrolli i kushtetutshmërisë së Ligjit për Specialen synohet me u bartë nga Dhoma Kushtetuese në Hagë te Gjykata Kushtetuese në Prishtinë.

Këtu e shoh problemin: neni 162, paragrafi 3, ia njeh Dhomës në Hagë kompetencën ekskluzive për referimet kushtetuese që lidhen me Dhomat e Specializuara dhe Prokurorinë e Specializuar. Sipas vlerësimit tim, këtë kompetencë nuk mundemi me ia heqë vetëm duke ndryshu ligjin.

Pa e zgjidhë këtë pengesë, kam frikë se nesër kemi me e dëgju arsyetimin: “Ne u munduam, por nuk ia arritëm.”

Me shpresën e popullit dhe të familjeve nuk duhet me lujt.

Prandaj, duhet me i dëgju profesionistët që ia duan të mirën vendit dhe çlirimtarëve, e që gjykojnë pa llogaritë sa vota fitojnë apo humbin. Le ta gjejmë një rrugë që mund të zbatohet.

Jam i gatshëm me ndihmu.

E di që ky qëndrim mundet me u keqkuptu dhe me pasë kosto politike për mua. Por dikush duhet me e marrë edhe këtë barrë.

Për këtë arsye, po kërkoj nga deputetët përgjigje para se të votojnë:

Çka ndodh pas votimit? Si kanë me u zbatu këto ndryshime dhe si kanë me iu ndihmu çlirimtarëve? Këto përgjigje ua keni borxh qytetarëve.

Përgjegjësia juaj nuk përfundon me votim.

comment Për komente lëvizni më poshtë
Sot mund të lexoni Shfletoni kopertinat