S’ka kuorum, shtyhet seanca ku u parapa të votohej Ligji për Specialen

Aktuale

S’ka kuorum, shtyhet seanca ku u parapa të votohej Ligji për Specialen

Më: 13 nëntor 2026 Në ora: 07:16 Përditësuar në ora: 11:45 më 13.11.2026
Kuvendi i Kosovës

Kuvendi ratifikon tri marrëveshje me Suedinë dhe një traktat me Belgjikën

Kuvendi i Kosovës ka ratifikuar tri marrëveshje me Mbretërinë e Suedisë dhe një traktat me Mbretërinë e Belgjikës, që kanë të bëjnë me bashkëpunimin juridik në çështjet penale.

“Duke respektuar të drejtat dhe liritë themelore të njeriut dhe garancitë e procesit të rregullt ligjor. Për Republikën e Kosovës, marrëveshje të tilla përfaqësojnë një dimension të rëndësishëm të bashkëpunimit evropian dhe të forcimit të kapaciteteve shtetërore për zbatimin efektiv të ligjit. Në bazë të nenit 18 të Kushtetutës, duke qenë se marrëveshja ndërlidhet me të drejtat dhe liritë themelore të njeriut, kërkohet edhe ratifikimi i saj nga Kuvendi. Prandaj, të nderuar deputetë, ju ftoj ta mbështesni këtë projekt”, tha ministrja e Drejtësisë, Donika Gërvalla.

Me këto marrëveshje, Kosova dhe Suedia rregullojnë bashkëpunimin në fushën e ekstradimit, transferimit të personave të dënuar dhe ndihmës së ndërsjellë juridike në çështjet penale.

Ndërkaq, traktati me Belgjikën ka të bëjë me ndihmën e ndërsjellë juridike në çështjet penale.

Poashtu, deputetët votuan edhe Programin e Punës së Kuvendit të Republikës së Kosovës për Sesionin Vjeshtor 2026.

“Më shpejt se kaq nuk mund të bëjmë”, Haxhiu befason me deklaratën për zgjedhjen e presidentes

Ka nisur seanca e Kuvendit të Kosovës, kur pritet të shqyrtohet edhe Projektligji për ndryshimin e Ligjit për Dhomat e Specializuara.

Paraprakisht, deputetët pritet të shqyrtojnë disa marrëveshje ndërkombëtare, si dhe interpelancën ndaj ministrit të Shëndetësisë, Arben Vitia. Në rendin e ditës është edhe një mocion përmbajtësor lidhur me çështjen e energjisë.

Ndërkaq, si pikë e fundit e seancës është paraparë shqyrtimi dhe miratimi në lexim të tretë i Projektligjit për Dhomat e Specializuara dhe Zyrën e Prokurorit të Specializuar.

Ky projektligj është përfshirë në rendin e ditës dje, pas kërkesës së ushtrueses së detyrës së kryetares së PDK-së, Vlora Çitaku, e cila ka paralajmëruar se do të sjellë një nismë të re ligjore për amendamentimin e tij brenda dy javësh.

Në fillim të seancës, kryetares së Kuvendit, Albulena Haxhiu, iu kërkua që të përshpejtohen procedurat për miratimin e marrëveshjeve ndërkombëtare, meqë, sipas deputetëve, ekziston konsensus për votimin e tyre.

Në përgjigjen e saj, Haxhiu tha se procedurat nuk mund të përshpejtohen më shumë sesa janë përshpejtuar në raste të veçanta, duke iu referuar edhe seancës për zgjedhjen e presidentes.

“Më shpejt se kaq nuk mund të bëhet”, Haxhiu befason me deklaratën për zgjedhjen e presidentes

“Më shpejt se kaq nuk mund të bëhet, përveç kur e kemi zgjedhur presidenten. Ajo seancë u shikua shumë dhe u komentua shumë për shpejtësinë tonë që kemi pasur dhe kemi bërë shumë mirë”, tha ajo.

Nis vazhdimi i seancës së Kuvendit të Kosovës

Kuvendi i Kosovës ka filluar punimet e seancës së sotme, në rend dite të së cilës janë disa pika, përfshirë edhe votimin e Ligjit për Specialen.

Pikat e rendit të ditës:

Shqyrtimi i Projektligjit nr. 11/L-024 për Ratifikimin e Marrëveshjes ndërmjet Republikës së Kosovës dhe Mbretërisë së Suedisë për Ekstradim;

Shqyrtimi i Projektligjit nr. 11/L-025 për Ratifikimin e Marrëveshjes ndërmjet Republikës së Kosovës dhe Mbretërisë së Suedisë për Transferimin e Personave të Dënuar;

Shqyrtimi i Projektligjit nr. 11/L-026 për Ratifikimin e Marrëveshjes ndërmjet Republikës së Kosovës dhe Mbretërisë së Suedisë për Ndihmën e Ndërsjellë Juridike në Çështjet Penale;

Shqyrtimi i Projektligjit nr. 11/L-027 për Ratifikimin e Traktatit për Ndihmë të Ndërsjellë Juridike në Çështjet Penale ndërmjet Republikës së Kosovës dhe Mbretërisë së Belgjikës;

Propozim-Programi i Punës së Kuvendit të Republikës së Kosovës për Sesionin Vjeshtor 2026;

Interpelanca me ministrin e Shëndetësisë, Arben Vitia, lidhur me vdekjen e pacientes me kancer të gjirit, e cila mbeti katër muaj pa terapi, si dhe mungesën e barnave onkologjike;

Mocioni përmbajtjesor mbi gjendjen në planifikimin, çmimin dhe furnizimin me energji elektrike në Kosovë.

Seanca e Kuvendit vazhdon sot, në rend dite votimi i Ligjit për Specialen

Seanca plenare e Kuvendit të Kosovës do të vazhdojë sot nga ora 11:00, ku në rend dite është edhe votimi i Ligjit për Specialen.

Seanca u ndërpre dje, pasi deputetët nuk u kthyen në sallë edhe gjysmë ore pas kohës kur ishte planifikuar të rifillonte, në orën 14:00.

Për këtë arsye, kryetarja e Kuvendit, Albulena Haxhiu, e shtyu seancën, duke i kritikuar deputetët.

“Kuvendi i vazhdon punimet të premten në orën 11:00. Nuk është serioze, gjysmë ore pas orës 14:00 nuk po vijnë deputetët. Nuk kam mundësi me funksionu dhe me prit deri në pafundësi”, ka thënë Haxhiu.

Pikë e rendit të ditës së kësaj seance u shtua edhe kërkesa e PDK-së për shqyrtimin e Ligjit për Dhomat e Specializuara dhe Zyrën e Prokurorit të Specializuar.

Në anën tjetër, Ligji për Specialen ka hasur në kritika nga akterë të huaj.

Britania e Madhe ka shprehur shqetësim për synimin e Kuvendit të Kosovës që të votojë sërish ndryshimet dhe plotësimet në Ligjin për Dhomat e Specializuara, duke paralajmëruar se një veprim i tillë mund të dëmtojë marrëdhëniet me partnerët ndërkombëtarë.

Në reagimin e Ambasadës Britanike në Prishtinë thuhet se amendamentet e propozuara nuk do t’u shërbenin interesave thelbësore të Kosovës.

Ambasada Gjermane në Kosovë ka reaguar lidhur me votimin e mundshëm në Kuvendin e Kosovës të ndryshimeve në Ligjin për Dhomat e Specializuara, duke shpërndarë në rrjetet sociale reagimin e Zyrës së Bashkimit Evropian në Kosovë.

“Ambasada Gjermane pajtohet plotësisht me shqetësimet e Zyrës së BE-së në Kosovë lidhur me votimin e mundshëm në Kuvendin e Kosovës të ligjit për ndryshimin dhe plotësimin e Ligjit për Dhomat e Specializuara”, thuhet në reagimin e ambasadës.

Ndërkohë, Zyra e BE-së në Kosovë ka shprehur shqetësim lidhur me votimin e mundshëm në Kuvend të këtyre ndryshimeve ligjore.

Sipas Zyrës së BE-së, ndryshimet ngrenë shqetësime serioze lidhur me obligimet ndërkombëtare të Kosovës dhe respektimin e parimeve themelore të sundimit të ligjit, veçanërisht pavarësinë e gjyqësorit, mbrojtjen e viktimave dhe dëshmitarëve, të drejtat procedurale dhe llogaridhënien efektive.

Zyra e BE-së ka theksuar se ndryshimet ngrenë shqetësime edhe për kushtetutshmërinë e tyre, duke kërkuar konsultime paraprake përpara çdo miratimi të ligjit, në përputhje me obligimet ndërkombëtare të Kosovës.

Sot mund të lexoni Shfletoni kopertinat