Pas dështimit në Kushtetuese, ligji i ri për konfiskimin e pasurisë merr dekretin e Presidentes

Aktuale

Pas dështimit në Kushtetuese, ligji i ri për konfiskimin e pasurisë merr dekretin e Presidentes

Nga: A.M. Më: 13 nëntor 2026 Në ora: 15:45
Albulena Haxhiu

Presidentja e Republikës së Kosovës, Justina Shiroka Pula, ka nënshkruar dekretin për shpalljen e Ligjit nr. 11/L-006 për Byronë Shtetërore për Verifikimin dhe Konfiskimin e Pasurisë së Pajustifikueshme.

Dekreti, me numër 17/2026, mban datën 13 nëntor 2026. Ligji ishte miratuar në Kuvend më 29 tetor dhe ishte pranuar në Zyrën e Presidentes më 9 nëntor.

Kryetarja e Kuvendit, Albulena Haxhiu, njoftoi se e ka pranuar sot dekretin nga Presidenca.

"Për secilin që ushtron funksion publik, është e qartë se çdo pasuri duhet të ketë burim të ligjshëm dhe të dokumentuar", ka shkruar Haxhiu në Facebook.

Ajo tha se Kuvendi do ta përcjellë nga afër ngritjen e Byrosë, ndërsa qytetarët, sipas saj, do ta matin ligjin me rezultatet që do të japë.

Ligji është hartuar nga Ministria e Drejtësisë dhe është miratuar nga Qeveria më 30 mars 2026. Sipas ministres së Drejtësisë, Donika Gërvalla, Byroja do t'i japë llogari Kuvendit e jo ekzekutivit. Ajo vetë nuk konfiskon pasuri, por mbledh, verifikon dhe analizon informacionet, ndërsa vendimin e merr gjykata.

Ky është tentimi i dytë për ngritjen e Byrosë. Ligji i mëparshëm, nr. 08/L-121, i miratuar në shkurt të vitit 2023, kur Haxhiu ishte ministre e Drejtësisë, u shpall kundërkushtetues nga Gjykata Kushtetuese pas kontestimit nga opozita.

 

comment Për komente lëvizni më poshtë
Sot mund të lexoni Shfletoni kopertinat