Isni Kilaj, i vetmi nga pesë të akuzuarit për pengim të drejtësisë që u shpall i pafajshëm në Hagë, thotë se edhe ai e konsideron veten të dënuar.
“Realitetisht edhe unë jam i dënuar”, tha Kilaj të martën mbrëma në emisionin “Debat Plus” të TV Dukagjinit. Ai kujtoi se ka mbajtur 18 muaj burg dhe se prej tri vjetësh është pjesë e një procesi që e quajti të stërzgjatur e të mundimshëm. Edhe në shtëpi, tha ai, ka qenë nën kufizime të rrepta.
Ish-kryetari i Malishevës tha se procesi nuk është dashur të fillonte fare dhe se ka qenë i padrejtë që nga nisja, me presion politik. Sipas tij, ndaj të akuzuarve ka pasur presion të madh për ta pranuar fajësinë, ndërsa dënimin e të tjerëve e quajti politik dhe të pabazë.
Kilaj tregoi se pas shpalljes së aktgjykimit e kanë takuar ish-presidentin Hashim Thaçi vetëm për pak minuta, në praninë e gardianëve. Qëndrimin e tij e përshkroi si dinjitoz.
Dhomat e Specializuara e dënuan të martën Thaçin me 17 muaj burgim, Bashkim Smakajn dhe Fadil Fazliun me nga 12 muaj, ndërsa Hajredin Kuçin me një muaj burgim me kusht.