Ministri i Energjisë i Australisë u ka kërkuar familjeve në Uellsin e Ri Jugor – një shtet me rreth 8 milionë banorë – që përfshin qytetin më të madh të vendit Sidnein – që të fikin dritat përballë një krize energjie.
Kështu, sipas mediave të huaja, Chris Bowen u ka bërë thirrje banorëve që të mos përdorin energjinë elektrike për dy orë çdo mbrëmje nëse “kanë një zgjidhje tjetër”.
Megjithatë, ai shtoi se ishte “i sigurt” se ndërprerjet e energjisë elektrike mund të shmangeshin.
Një kërkesë e tillë vjen pasi tregu kryesor me shumicë i energjisë elektrike në Australi u pezullua për shkak të rritjes së çmimeve.
Pse ka krizë?
Australia është një nga eksportuesit më të mëdhenj në botë të qymyrit dhe gazit natyror të lëngshëm, por është duke luftuar me një krizë energjie që nga muaji i kaluar.
Tre të katërtat e energjisë elektrike të vendit ende prodhohen duke përdorur qymyr.
Ajo është akuzuar prej kohësh se nuk bën mjaftueshëm për të ulur emetimet e saj duke investuar në burimet e rinovueshme.
Megjithatë, në javët e fundit, Australia ka ndjerë ndikimin e ndërprerjeve në furnizimet me qymyr, ndërprerjet në disa termocentrale me qymyr dhe çmimet e larta globale të energjisë.
Gjithashtu, edhe përmbytjet në fillim të këtij viti goditën disa miniera qymyri në Uellsin e Ri Jugor dhe Queensland, ndërsa çështjet teknike kanë ulur prodhimin në dy miniera që furnizojnë stacionin më të madh të tregut me qymyr në Uellsin e Ri Jugor.
Si pasojë, rreth një e katërta e kapacitetit gjenerues të energjisë elektrike në Australi me qymyr është aktualisht jashtë shërbimit për shkak të ndërprerjeve të papritura dhe mirëmbajtjes së planifikuar.
Këto dhe çështje të tjera kanë ndihmuar në rritjen e çmimeve të energjisë në tregun me shumicë në mbi 300 dollarë Australianë (rreth 200 euro) për megavat orë – kufiri i vendosur nga rregullatori i tregut, Operatori Australian i Tregut të Energjisë (Aemo).
