​Hajdari thotë se kanë nisur reforma serioze për tërheqjen e investimeve të huaja

Ekonomi

​Hajdari thotë se kanë nisur reforma serioze për tërheqjen e investimeve të huaja

Më: 23 prill 2022 Në ora: 21:07
Albin Kurti dhe Rozeta Hajdari

Ministrja e Ministrisë së Industrisë, Ndërmarrësisë dhe Tregtisë, Rozeta Hajdari ka thënë se për të krijuar një mjedis më të mirë dhe më të sigurtë, për tërheqjen e investimeve të huaja, kanë nisur një reformë serioze strukturore siç janë reforma në drejtësi me legjislacion të mirë në përputhje me standardet e BE-së, reforma në administratën publike dhe reforma për përmirësimin e mjedisit të të bërit biznesi dhe zhvillimin e konkurrencës në sektorin privat.

Ajo ka shkruar se bashkë me kryeministrin e Republikës së Kosovës, Albin Kurtin dhe me bashkëpunëtorë e kolegë, kanë marrë pjesë në Forumin Ekonomik të organizuar në mes Republikës së Kosovës dhe Republikës së Austrisë me temën “Klima ekonomike dhe e investimeve në Kosovë”, me qëllim të intensifikimit të mëtejshëm të bashkëpunimit për zgjerimin dhe diversifikimin e tregtisë dypalëshe dhe rritjen e investimeve.

“Në këtë Forum Ekonomik theksova se Qeveria Kurti me parimet e qeverisjes së mirë, me politikat dhe legjislacionet e reja për përkrahjen dhe mbrojtjen e investimeve, me potencialet konkurruese ‘nearshoring’ dhe me bashkëpunimin e afërt dhe transparent, ka rritur besimin për të investuar në Republikën e Kosovës. Për të krijuar një mjedis më të mirë dhe më të sigurtë, për tërheqjen e investimeve të huaja, ne kemi nisur një reformë serioze strukturore siç janë: reforma në drejtësi me legjislacion të mirë, në përputhje me standardet e BE-së, reforma në administratën publike dhe reforma për përmirësimin e mjedisit të të bërit biznesi dhe zhvillimin e konkurrencës në sektorin privat.

Gjithashtu, me kënaqësi sjella në pah përparësitë konkurruese për investime " nearshoring" , fleksibilitetin që ju ofron Kosova kompanive austriake, gjatë operimit të tyre në të njëjtën zonë kohore, por me kosto më të ulët operacionale. Infrastruktura e zhvilluar rrugore dhe dixhitale dhe afërsia me portin e Durrësit, janë mundësi për rritjen e mundësive tregtare dhe investimeve, rinia kreative e shumëgjuhëshe dhe me aftësi të mira dixhitale, tatimet e ulëta dhe valuta Euro janë përparësi për të ulur kostot e transaksioneve dhe rreziqet e kursit të këmbimit, janë faktorë ideal që afrojnë investitorët austriakë dhe ndërkombëtarë për të investuar në vendin tonë. Republika e Kosovës është përherë falënderuese ndaj Republikës së Austrisë dhe zotohemi për bashkëpunimin e ngushtë bilateral në aspektin politik dhe ekonomik, në të mirën e dy vendeve të renditura së bashku, për paqë e prosperitet dhe të ardhme të ndritur për qytetarët tanë”, ka shkruar ajo.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat