​Dhjetëra kërkesa të bizneseve i dorëzohen zëvendësministrit Durmishi

Ekonomi

​Dhjetëra kërkesa të bizneseve i dorëzohen zëvendësministrit Durmishi

Më: 12 maj 2022 Në ora: 16:52
Oda e Afarizmit të Kosovës

Oda e Afarizmit të Kosovës ka zhvilluar sot një takim me zëvendësministrin e Mjedisit Hysen Durmishi dhe bizneset anëtare.

Në këtë takim u diskutua mbi sfidat e sektorit të transportuesve, kufizimi i lejeve të transportit e lejet e vendeve të treta, taksa ekologjike për rimorkio, rritja e çmimeve furnizuese, mungesa e vizave për shoferë, mosnjohja e patentë shoferëve, sinjalizimi i rrugëve sipas standardeve si dhe pajisjet me leje mjedisore e ujore.

Kryetari i Odës së Afarizmit të Kosovës, Skënder Krasniqi falënderoi zëvendësministrin Durmishi për gatishmërinë për të realizuar një komunikim të drejtpërdrejtë me komunitetin e biznesit, pasi që konsideroi që kjo është mënyra më e lehtë për të identifikuar dhe zgjidhur së bashku sfidat e bizneseve duke i prezantuar me dhjetëra kërkesa të bizneseve.

Ai shtoi që institucionet vendore, me theks të veçantë MMPHI duhet të lobojë që Kosova të jetë anëtare e Rrjetit Evropian të Transportit CEMT, gjë e cila do të mundësonte realizimin e transportit ndërkombëtar, gjë që po i shkakton vendit tonë humbje në miliona euro.

Gjithashtu, sektori i transportit po dëmtohet edhe nga Ligji për Taksë Rrugore dhe Ekologjike të Automjeteve, me të cilin rregullohet edhe taksa ekologjike për rimorkio, e po ashtu u konsiderua si shumë e domosdoshme sinjalizimi i rrugëve sipas standardeve, pasi që në baza ditore po raportohen raste të aksidenteve me fatalitet.

Zëvendësministri Durmishi tha se janë duke punuar në trajtimin e çdo kërkese të deleguar nga bizneset si dhe janë duke trajtuar ligjet dhe udhëzimet administrative që janë në kuadër të MMPHI-së, në mënyrë që të thjeshtësohen procedurat burokratike.

Ai shtoi që aktualisht janë duke punuar në arritjen e marrëveshjes me Maqedoninë e Veriut dhe Turqinë për numrin e lejeve të transportit, e gjithashtu po trajtojnë edhe kërkesat e adresuara nga bizneset për kontratat publike.

Sipas tij, MMPHI ka shënuar avancim në çështjen e kalimit nga tahografët analog në ato digjital, e për të cilën pritet që shumë shpejt Kosova të pajiset me kodin shtetëror, gjë e cila do të krijoj shumë lehtësira për ekonominë vendore.

Durmishi shtoi që MMPHI me të gjithë kapacitetin e saj është e angazhuar që të mbroj bizneset vendore si dhe të krijoj sa më shumë lehtësira për të njëjtat.

Në pjesën e diskutimit të hapur, bizneset parashtruan kërkesat e tyre për zëvendësministrin Durmishi, nga i cili u pranuan përgjigje konkrete.

Në fund u dakordua që në një kohë të shkurtër të realizohet takimi i radhës për të diskutuar me zëvendësministrin mbi realizimin e kërkesave të adresuara nga ana e OAK-ut.

Përmes takimeve të natyrës së tillë, Oda e Afarizmit të Kosovës në vazhdimësi po kontribuon në rritjen e bashkëpunimit e komunikimit të drejtpërdrejtë të komunitetit të biznesit me institucionet, pasi që beson fuqishëm që vetëm në këtë mënyrë do të arrihet deri tek krijimi i një ambienti sa më të favorshëm për të bërit biznes në vend.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat