Në Ligjin për Mbrojtjen e Konsumatorëve do të përfshihet blerja online

Ekonomi

Në Ligjin për Mbrojtjen e Konsumatorëve do të përfshihet blerja online

Më: 25 qershor 2022 Në ora: 21:25
Ilustrim

Ministria e Industrisë, Ndërmarrësisë dhe Tregtisë ditë më parë ka nxjerrë në konsultim publik Projektligjin për plotësim/ndryshimin e Ligjit për Mbrojtjen e Konsumatorëve. Ligji që aktualisht është në fuqi, nuk e përfshin blerjen online, por kjo fushë mbulohet nga neni 37 për kontratat në distancë dhe jashtë objektit afarist.

Nijazi Shala, drejtor i Departamentit për Mbrojtje të Konsumatorit në kuadër të MINT-it në emisionin “Betimi për Drejtësi”, ka thënë se me projektligjin e ri do të përfshihet edhe blerja online.

“Gjithçka çka blihet jashtë objektit afarist dhe në distancë që ka qenë, që nuk është përmend saktë internet, tash gjithçka e ka edhe blerjen në internet”, ka thënë ai.

Ndërsa, Fatbardha Restelica nga platforma “Mbrojtësit e Konsumatorëve”, potencoi se janë duke e analizuar projektligjin, teksa tregoi se çka duhet të përfshijë i njëjti.

“Është shumë me rëndësi që të përfshihet në formën e ardhshme të ligjit komplet direktiva e Bashkimit Evropian për blerjet online, edhe të njëjtat të bëhen të implemetueshme. Sepse pastaj po mungon edhe buxhetimi i implementimit të ligjit nga institucionet përkatëse. Ne po avokojme që kjo të përfshihet komplet, e cila me pastaj do e rregullonte blerjet online edhe do i detyronte edhe institucionet tjera të bëjnë më shumë në këtë drejtim, që t’i detyroi bizneset ilegale të fiskalizohen”, ka theksuar Restelica.

Sipas saj, rritja e gjobave ndaj personave që bëjnë tregti ilegale dhe aktivizimi më i madh i Policisë do ta rregullonte këtë treg.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat