Turqia ka lëshuar një urdhër të ri arrestimi për bosin e krimit, Sedat Peker i cili iku nga ndjekja penale jashtë vendit.
Ai më pas filloi postimin e videove që pretendojnë krime të rënda të kryera nga aleatët e presidentit, Recep Tayyip Erdogan.
Duke iu përgjigjur akuzave për herë të parë, Erdogan u zotua të qëndrojë “krah për krah” me ministrin e brendshëm, Suleyman Soylu, një nacionalist i cili shihet si një nga zyrtarët më të njohur dhe më të fuqishëm të Turqisë.
“Ne kemi shkatërruar organizatat kriminale një nga një për 19 vjet,” tha Erdogan. “Ne ndjekim anëtarët e bandave kriminale kudo ku ata mund të ikin në botë. Bandat kriminale do t’i dorëzojmë në gjyqësor”, shtoi ai.
Theksojmë se presidenti turk ka mbajtur një fjalim edhe para grupit të tij parlamentar, AKP, teksa ka theksuar se shteti nuk do të dorëzohet para krimit, raporton theguardian.
Akuzat që Peker ka ngritur ndaj aleatëve të Erdoganit, duke përfshirë një ish-kryeministër, zyrtarë të lartë dhe të afërmit e tyre, ndryshojnë nga korrupsioni dhe trafiku i drogës te përdhunimet dhe atentatet.
Videot janë përqendruar shumë tek ministri i brendshëm, Suleyman Soylu, për të cilin Peker pretendon se i kishte ofruar mbrojtje dhe më pas e informoi për akuzat e afërta, duke e lejuar të ikte jashtë vendit.
