Policia braziliane ka gjetur mbetje të mundshme njerëzore në kërkimet për gjetjen e gazetarit britanik Dom Phillips dhe ekspertit indigjen Bruno Pereira.
Policia thotë se ekspertët do të analizojnë "materialin organik" të gjetur në një lumë pranë qytetit të Atalaia do Norte në pyjet e largëta të Amazonës.
Gjithashtu do të testohen gjurmët e gjakut të gjetura në një varkë të një peshkatari, i cili është arrestuar.
Phillips e Pereira u zhdukën ndërsa udhëtonin me varkë në një udhëtim raportues të dielën e kaluar.
Grupet indigjene thonë se të dy burrat kanë marrë kërcënime për punën e tyre në rajon, ku ka pasur peshkim të paligjshëm, prerje pyjesh, miniera dhe trafik droge.
Autoritetet braziliane kanë thënë se shpresojnë t'i gjejnë dy burrat gjallë, por nuk kanë përjashtuar ndonjë rezultat.
Pereira, 41, dhe Phillips, 57, i cili ka shkruar për Guardian dhe Washington Post, kanë përvojë të madhe dhe i kanë planifikuar udhëtimet e tyre tërësisht. Thuhet se ata kishin një varkë të re dhe shumë karburant.
Paul Sherwood, partneri i motrës së Phillips, Sian, tha se raportet se policia kishte gjetur mbetje njerëzore ishin "tronditëse" dhe "sugjeron ngjarje të liga".
“Është e qartë se ka pasur kërcënime dhe njerëz të armatosur në zonë që kanë lëshuar ato kërcënime dhe mund të kenë qenë përgjegjës për sulmin ndaj tyre, kështu që padyshim që duhet të shpresojmë se nuk ishte kështu, por provat duket se po shtohen se diçka e tillë ka ndodhur”, tha Sherwood.
Gjurmët e gjakut u gjetën në varkën e peshkatarit Amarildo da Costa, i njohur si "Pelado", i cili u mor në pyetje në qytetin Atalaia do Norte. Ai është akuzuar për mbajtje pa leje të municionit të kufizuar.
Policia thotë se ai ishte një nga njerëzit e fundit që pa Pereira dhe Phillips.
Gjashtë persona të tjerë janë marrë në pyetje në lidhje me zhdukjen e burrave.
Rreth 250 anëtarë të forcave të sigurisë kanë marrë pjesë në kërkim. Ata përfshijnë zhytës dhe ekspertë në terrenin e xhunglës. Gjithashtu po përdoren dy helikopterë, si dhe shumë varka dhe drone, raporton BBC.
