LIVE: Ukraina në pritje të ‘lajmit të mirë’; Rusia lëshon kërcënimin e radhës – priten zhvillime të forta!

Presidenti Joe Biden u takua me kryeministrin britanik Keir Starmer në Shtëpinë e Bardhë të premten për të diskutuar mbështetjen për Ukrainën, mes kërkesve të shumta nga Kievi për partnerët perëndimorë për të hequr kufizimet në përdorimin e raketave të tyre me rreze të gjatë veprimi. Ukraina thotë se një gjë e tillë do të mundësonte goditjen e objektivave ushtarake më në thellësi të territorit rus.

Pas më shumë se dy vjet e gjysmë Rusia vijon sulmet ndaj Ukrainës ndërsa presidenti amerikan Joe Biden dhe kryeministri britanik Keir Starmer u takuan në Shtëpinë e Bardhë.

“Shtetet e Bashkuara janë të përkushtuara të qëndrojnë krah jush për të ndihmuar Ukrainën, ndërsa ajo mbrohet nga agresioni i Rusisë. Është e qartë se Presidenti rus Vladimir Putin nuk do ta fitojë këtë luftë”, deklaroi zoti Biden.

“Mendoj se javët dhe muajt e ardhshëm mund të jenë vendimtare. Është shumë, shumë e rëndësishme që ne të mbështesim Ukrainën në këtë luftë jetike për liri”, deklaroi Kryeministri britanik.

Ky takimi vjen pasi aleatët perëndimorë po shqyrtojnë mundësinë për ndryshimin e politikës së tyre për të lejuar Ukrainën për të përdorur armë me rreze të gjatë të dhëna nga Shtetet e Bashkuara dhe Britania për të goditur thellë në territorin rus. Presidenti ukrainas Volodymyr Zelenskyy prej kohësh ka këruar këtë.

“Vonesat në këtë proces do të lejojnë Rusinë të zhvendosë objektivat ushtarake më thellë në territorin e saj”, ka thënë zoti Zelenskyy.

Moska ka paralajmëruar se armatosja e Kievit me armë me rreze të gjatë do të përshkallëzonte konfliktin përtej Ukrainës.

“Kjo do të thotë se vendet e NATO-s, Shtetet e Bashkuara, vendet evropiane janë në luftë me Rusinë”, deklaroi Presidenti rus.

Ndërsa zoti Biden po shqyrton vendimin, ekspertët thonë se duhen marrë parasysh perspektivat për përshkallëzimin e konfliktit me Rusinë, një fuqi bërthamore. Ndërsa Shtëpia e Bardhë thotë tani për tani nuk ka një ndryshim, disa analistë thonë se diskutimet po zhvillohen.

“Unë mendoj se do të arrijmë në një pikë kur ukrainasit do të përdorin raketa perëndimore për të goditur thellë brenda territorit rus. Pyetja është nëse kjo do të sjellë një ndryshim domethënës për zhvillimin aktual të luftës”, thotë Dalibor Rohac, nga American Enterprise Institute.

Një tjetër çështje që adaministrata Biden po shqyrton janë edhe paralajmërimet nga agjencitë amerikane të inteligjencës se Rusia mund të përgjigjet duke ndihmuar Iranin të godasë forcat amerikane në Lindjen e Mesme.

Shtetet e Bashkuara kanë shtyrë Izraelin dhe Hamasin që të arrijnë një armëpushim në Gazë, një çështje që presidenti Biden dhe kryeministri britanik gjithashtu e diskutuan të premten.

Javën e kaluar, qeveria e zotit Starmer njoftoi se do të pezullonte disa licenca të eksportit të armëve në Izrael. Administrata e zotit Biden i ka rezistuar trysnisë nga demokratët progresivë apo myslimanët dhe arabo-amerikanët për të miratuar kufizime të tilla./VOA

Ministria Britanike e Mbrojtjes ka publikuar fotografi të reja që tregojnë ura të shkatërruara nga forcat ukrainase.

Ministria e Mbrojtjes shfaqi fotografi të tri urave të shkatërruara rrugore dhe ponton mbi lumin Seym, duke shtuar se dëmi po pengonte logjistikën ruse.

Njoftimi i ministrisë përfshin imazhe të urave para dhe pas shkatërrimit të tyre.

Është e gjitha pjesë e inkursionit aktual të Ukrainës përmes Kurskut, e cila filloi në muajin gusht.

Lumi Seym rrjedh përmes rajonit Kursk në perëndim të Rusisë. Pothuajse 800 kilometra katrorë të atij rajoni ndodhet midis lumit dhe kufirit me Ukrainën.

Latest Defence Intelligence update on the situation in Ukraine - 14 September 2024.

Ukraine continue to hamper Russian logistics in the Kursk region in a series of strikes which destroyed road and pontoon bridges over the Seym river.#StandWithUkraine 🇺🇦 pic.twitter.com/C8VgcAHmXQ

— Ministry of Defence 🇬🇧 (@DefenceHQ) September 14, 2024

Ndryshe, forcat e Kievit shkatërruan gjithashtu disa ura muajin e kaluar.

Forcat ruse kanë vazhduar ofensivën e tyre në rajonin lindor ukrainas të Donjeckut, teksa të dyja palët raportohet se kanë realizuar edhe një këmbim të ushtarëve të burgosur.

Guvernatori rajonal i Donjeckut, Vadym Filashkin, tha më 14 shtator se katër civilë janë vrarë dhe shtatë janë plagosur, pasi Rusia kreu më shumë se 20 sulme, duke detyruar më shumë se 900 banorë që të evakuohen.

Forcat ruse kanë vazhduar përparimin e tyre drejt Pokrovskut, një qendër e rëndësishme logjistike dhe e furnizimeve për trupat ukrainase, që gjendet në vijën e frontit në lindje të Ukrainës.

Ushtria ukrainase ka raportuar për mbi 130 beteja, shumica në drejtim të Pokrovskut, apo afër qytetit Kurkove.

Të shtunën, Ministria ruse e Mbrojtjes raportoi se ka marrë nën kontroll fshatin Zhelane Pershe, vetëm 20 kilometra larg qytetit Kurkove.

Rusia po ashtu ka kryer sulme me dronë dhe ukraina tha se ka rrëzuar mbi 70 dronë rusë.

Luftimet në Ukrainë vijnë në kohën kur Rusia po tenton të dëbojë forcat e Kievit nga territori i saj. Ukraina ka marrë nën kontroll më shumë se 1.300 kilometra katrorë në rajonin rus të Kurskut, pasi nisi ofensivën atje në gusht.

Më 14 shtator, Rusia dhe Ukraina po ashtu kanë këmbyer nga 103 ushtarë të burgosur. Ky është këmbimi i tretë i të burgosurve, që kur Ukraina nisi ofensivën në Rusi./REL

Zyrtarët rusë kërcënuan të shtunën Perëndimin me një përshkallëzim të pakontrolluar të luftës, si dhe Ukrainën se do të shkatërrojnë Kievin. Komentet vijnë ndërsa udhëheqësit perëndimorë diskutuan nëse do të lejojnë Ukrainën të përdorte armët për sulme më në thellësi të territorit rus.

Presidenti ukrainas Volodymyr Zelenskiy tha të premten vonë në mbrëmje se plani i tij për të arritur fitoren varej nga vendimi i Uashingtonit, çka dukshëm i refererohej kërkesës së bërë prej kohësh nga Kievi për të marrë autorizim nga vendet e NATO-s, për sulme me raketa me rreze të gjatë veprimi.

Andriy Yermak, kreu i zyrës së zotit Zelenskiy, shkruante në aplikacionin e mesazheve 'Telegram' të shtunën se: "Duhen vendime të forta. Terrori mund të ndalet duke shkatërruar objektet ushtarake në origjinë".

Kievi ka thënë se sulme të tilla janë jetike për përpjekjet e vendit për të kufizuar aftësinë e Moskës për të sulmuar Ukrainën, por deri më tani aleatët kanë hezituar ta lejojnë një gjë të tillë, nga droja për një përshkallëzim të konfliktit e mes dyshimeve në efikasitetin e këtyre sulmeve.

Ndërsa mbi këtë çështje nuk është marrë ende asnjë vendim zyrtar, zëvendësministri i Jashtëm rus Sergei Ryabkov pretendoi se vendimi ishte marrë tashmë dhe se i ishte komunikuar Kievit. Ai shtoi se Moska do të duhej të përgjigjej me veprimet e saj.

"Vendimi është marrë, u është dhënë liri e plotë për të vepruar, kështu që ne jemi gati për gjithçka", kishte thënë zoti Ryabkov sipas agjencisë ruse të lajmeve 'RIA'.

"Ne do të reagojmë në një mënyrë që nuk do të jetë aspak e këndshme", shtonte ai.

Ish-Presidenti rus Dmitry Medvedev, i cili aktualisht shërben si nënkryetar i Këshillit të Sigurisë, tha se Perëndimi po vinte në provë durimin e Rusisë, duke shtuar se ai, nuk ishte i pakufishëm.

Zoti Medvedev tha se inkursioni i Ukrainës në rajonin rus të Kurskut, që zoti Zelenskiy e ka cilësuar si një operacion të suksesshëm që po ngadalëson përparimin e Rusisë, i ka krijuar tashmë Moskës baza ligjore, për të përdorur arsenalin e saj bërthamor.

Zoti Medvedev tha se Moska ose mund të përdorë në fund armët bërthamore, ose disa nga armët e saj të reja, jo-bërthamore, por vdekjeprurëse, për një sulm në shkallë të gjerë.

"Dhe me kaq do të merrte fund. Çka do të mbetej do të ishte një vend i shkrirë, një re gjigante gri, në vend të 'nënës së qyteteve ruse", shkruante ai në 'Telegram', duke iu referuar Kievit.

Duke iu drejtuar Presidentit rus Vladimir Putin, zyrtari ukrainas Yermak tha se: "Kërcënimet me zë të lartë të regjimit të Putinit dëshmojnë vetëm se ai ka frikë se terrori i tij mund të marrë fund"./VOA

Presidenti ukrainas, Volodymyr Zelensky, për muaj të tërë po u lutet Shteteve të Bashkuara dhe Britanisë që t’i japin të drejtë që të përdorë raketat e tyre me rreze të gjatë veprimi për të sulmuar thellë brenda Rusisë.

Ai, më në fund duket se është afër arritjes së këtij qëllimi.

Javëve të fundit ka pasur një momentum lidhur me heqjen e këtyre kufizimeve, para se të mbahej një takim kyç mes presidentit amerikan, Joe Biden, dhe kryeministrit britanik, Keir Starmer, në Uashington më 13 shtator. Dy liderët pritej të diskutonin mbi mbështetjen për Ukrainë, por jo edhe që zyrtarisht të njoftonin për ndryshim të kësaj politike.

Por, vetë takimi dhe informacionet e tjera të raportuara gjatë javës dhanë pamjen se diçka po ndodhte. I pyetur më 11 shtator nëse ai do të hiqte kufizimin për përdorimin e raketave me rreze të gjatë veprimi, Biden tha “ne po punojmë për këtë”, duke sinjalizuar një ndryshim të mundshëm në qëndrimin e tij. Deklarata erdhi pasi shumë anëtarë të Kongresit amerikan, përfshirë edhe nga Partia e tij Demokratike, i bënë thirrje presidentit që të zbuste politikën e tij.

“Pres që së shpejti të shohim një njoftim për lehtësimin e kufizimeve. Ka pasur një intensifikim të jashtëzakonshëm drejt kësaj dhe do të ishte shumë e vështirë që të ketë një tërheqje”, tha për Radion Evropa e Lirë, Mark Cancian, analist ushtarak në Qendrën për Studime Strategjike dhe Institucionale.

“Dyshoj se SHBA-ja dhe Mbretëria e Bashkuar po përcaktojnë kushtet, veçmas sa i përket caqeve, sepse ata do të duan të kufizojnë sulmet vetëm në caqe ushtarake, në mënyrë që të shmangen viktimat civile”.

Caqet e mundshme të lejuara për sulme me rreze të gjatë veprimi do të përfshinin bazat ajrore, qendrat logjistike, depotë dhe selitë, tha ai.

Që nga fillimi i këtij viti, Ukraina vazhdimisht ka goditur asetet energjetike të Rusisë, në veçanti rafineritë e naftës dhe objektet e magazinimit, me dronët e saj që i ka prodhuar vetë, që kanë rreze të gjatë veprimi. Edhe pse ato janë caqe legjitime ushtarake brenda Rusisë, administrata Biden nuk ka shprehur mbështetje për sulme të tilla.

Gazeta britanike, Guardian, raportoi më 12 shtator se Londra veçse i ka dhënë dritën e gjelbër Ukrainës që të përdorë raketat e saj lundruese, Storm Shadow – të cilat mund të udhëtojnë deri në 250 kilometra – për sulme me rreze të gjatë veprimi thellë brenda territorit rus. Londrës i duhet të marrë leje nga Uashingtoni për këtë, pasi raketat kanë pjesë amerikane.

Duke i dhënë leje Ukrainës për përdorimin e Sistemit Raketor Taktik Ushtarak (ATACMS) – një raketë e fuqishme hipersonike, balistike, që mund të udhëtojë deri në 300 kilometra – për të shkatërruar asetet e ushtrisë ruse larg nga vija e frontit, do të ishte në linjë me modelin e vendosur nga administrata Biden që nga nisja e pushtimit të Ukrainës nga Rusia.

Administrata Biden fillimisht kishte refuzuar kërkesën e Ukrainës për tanket Abrams, për avionët luftarakë F-16 ,për Sistemin raketor të artilerisë me lëvizshmëri të lartë (HIMARS) dhe ATACMS, pjesërisht për shkak të shqetësimit se Rusia mund t’i shihte si provokim. Biden përfundimisht u dorëzua para këtyre kërkesave, pas rritjes së presionit nga Ukraina, aleatët dhe nga presioni brenda SHBA-së.

Më herët gjatë këtij viti, teksa forcat ruse u përqendruan pranë kufirit me qëllim që të ripushtonin Harkivin, qytetin e dytë më të madh të Ukrainës, administrata Biden zbuti politikën e saj dhe i lejoi Ukrainës që të përdorte raketat ATACMS për të sulmuar në zonat kufitare në Rusi, por jo thellë brenda territorit rus.

Bombat rrëshqitëse

Thirrja për lehtësimin e kufizimeve sa i përket sulmeve me rreze të gjatë veprimi është rritur gjatë këtij viti, përderisa Rusia po vazhdon të terrorizojë trupat ukrainase dhe qytetet përmes sulmeve me bombat e fuqishme rrëshqitëse, që vështirë detektohen nga radarët. Në qershor, Zelensky tha se Rusia po gjuante në Ukrainë deri në 3.000 bomba rrëshqitëse në muaj.

Sulmet nga ajri i pozicioneve ukrainase u ka mundësuar trupave tokësore ruse – megjithëse me kosto të madhe me jetë dhe pajisje – të fitojnë territor, duke kërcënuar qytetet kyçe logjistike, sikurse Pokrovsku.

Mbrojtja më e mirë kundër bombave rrëshqitëse është duke i shkatërruar avionët që i lëshojnë ato dhe duke i larguar këta avionë nga vijat e frontit, diçka që mund të arrihet duke sulmuar bazat ajrore, thanë ekspertët.

Por, Cancian pajtohet me deklaratën që bëri javën e kaluar sekretari amerikan i Mbrojtjes, Lloyd Austin, i cili tha se lehtësimi i kufizimeve nuk do të ndryshojë rrjedhën e luftës në favor të Ukrainës.

Cancian vuri në pah ndikimin e kufizuar që kanë pasur deri më tani armët perëndimore me rreze të gjatë veprimi në Krimenë e kontrolluar nga Rusia. Ukraina ka goditur me këto armë bazat ajrore dhe asete të tjera ushtarake të Rusisë në këtë gadishull. Përderisa, sulmet kanë dobësuar aftësitë e Moskës, ato nuk kanë qenë vendimtare për luftën, tha ai.

Ai shtoi se përdorimi i raketave precize me rreze të gjatë veprimi brenda Rusisë do ta bënte më të vështirë për Moskën që të kryejë sulme me bomba rrëshqitëse dhe do ta detyronte që të shpërndante selitë ushtarake dhe qendrat logjistike, duke bërë që operacioni i saj ushtarak të ishte më pak efikas.

“Nuk do ta ndryshonte lojën, por do të ndihmonte”, tha ai.

Kërcënimet e Putini

Teksa u rrit momentumi gjatë kësaj jave lidhur me lehtësimin e kufizimeve, presidenti rus, Vladimir Putin, bëri paralajmërimin e tij të fundit ndaj Perëndimit lidhur me mbështetjen e Ukrainës. Ai tha se do ta shihte ndryshimin e një politike të tillë si “pjesëmarrje të drejtpërdrejtë” të shteteve të NATO-s në luftën në Ukrainë. Megjithatë, ai nuk tregoi se si do të reagonte.

Më 2022, Putin kishte lënë të kuptohej se do të përdorte armë taktike bërthamore, deklaratë që nxiti një përgjigje të menjëhershme negative në mbarë botën, përfshirë edhe nga vendet mike, sikurse India. Më herët gjatë këtij viti, pas ndryshimit të fundit të politikës së SHBA-së, Putin tha se Rusia mund të furnizojë me armë vdekjeprurëse kundërshtarët perëndimorë.

Deklarata të tilla të Putinit kanë ndikuar që administrata Biden të ketë një qasje të kujdesshme sa i përket furnizimit të Ukrainës me armë gjithnjë e më të sofistikuara, sikurse janë avionët luftarakë F-16, me raketa me rreze të gjatë veprimi dhe sa i përket lejimit të kryerjes së sulmeve brenda Rusisë. Disa ekspertë argumentojnë se kërcënimet e Putinit janë boshe, duke thënë se ai asnjëherë deri më tani nuk e ka çuar deri në fund ndonjë kërcënim dhe SHBA-ja nuk duhet t’i marrë parasysh këto kërcënime.

David Kramer, i cili ka shërbyer si ndihmëssekretar i Shtetit për Demokracinë, të Drejtat e Njeriut nga 2008 deri më 2009, gjatë një konference më 12 shtator deklaroi se Putini po e përdor kërcënimin bërthamor për të minuar vendosmërinë e Perëndimit.

“Realisht, unë paralajmëroj kundër mbivlerësimit të mundësisë së përshkallëzimit bërthamor. Kjo është ajo që Putini dëshiron që ne të mendojmë. Le të mos biem pre e këtij provokimi”, tha Kramer, ekspert për Rusinë, i cili është drejtor ekzekutiv i Institutit George W.Bush./REL

“Unë nuk mendoj shumë për Putinin,” tha presidenti amerikan Joe Biden kur u pyet për kërcënimet e të fortit të Kremlinit për rrezikun e luftës midis Rusisë dhe NATO-s.

Presidenti rus Vladimir Putin tha të enjten se nëse Perëndimi lejon Kievin të përdorë raketat me rreze të gjatë veprimi që furnizon për të goditur objektivat në tokën ruse, kjo do të thotë se ” vendet e NATO-s janë në luftë me Rusinë “.

Gjatë takimit të djeshëm me kryeministrin britanik Keir Starmer në Shtëpinë e Bardhë, presidenti amerikan shprehu edhe një herë besimin se Vladimir Putin nuk do të fitojë në luftën kundër Ukrainës.

Qeveria e Mbretërisë së Bashkuar ka thënë se pretendimet e bëra nga shërbimet ruse të sigurisë për gjashtë anëtarë të stafit diplomatik britanik që ka dëbuar nga Rusia janë “të pabaza”.

Shërbimi rus i sigurisë FSB ka njoftuar të premten se ka revokuar akreditimin e gjashtë diplomatëve britanikë në Moskë, me arsyetimin se veprimet e tyre treguan shenja të spiunazhit dhe sabotimit.

“Akuzat e bëra sot nga FSB-ja ndaj stafit tonë janë krejtësisht të pabaza. Autoritetet ruse revokuan akreditimin diplomatik të gjashtë diplomatëve të Mbretërisë së Bashkuar në Rusi muajin e kaluar, pas veprimeve të ndërmarra nga qeveria e Mbretërisë së Bashkuar në përgjigje të aktivitetit të drejtuar nga shteti rus në të gjithë Evropën dhe në Mbretërinë e Bashkuar. Ne nuk kërkojmë falje për mbrojtjen e interesave tona kombëtare.

Njoftimi se Rusia evokoi akreditimin e gjashtë diplomatëve britanikë në Moskë me akuza për spiunazh erdhi ndërsa Keir Starmer po zbarkonte në Uashington për të diskutuar për lejimin e Ukrainës të përdorë raketa me rreze të gjatë veprimi thellë brenda territorit rus”, thuhet në reagimin e qeverisë së Mbretërisë së Bashkuar.

Bashkimi Evropian e ka larguar të premten prej listës së sanksioneve, Violetta Prigozhinan, nënën e liderit të ndjerë të grupit mercenar rus, Wagner, Yevgeny Prigozhin.

Bashkimi Evropian ka ngrirë asetet dhe ka vënë ndalesë në viza për 2.300 njerëz dhe subjekte prej kur Rusia e ka nisur luftën në Ukrainë, në shkurt të vitit 2022.

Vendimi i BE-së për të larguar Prigozhinan prej listës së sanksioneve është bazuar në vendimin e marrë prej Gjykatës së Përgjithshme të BE-së, në mars të vitit 2023.

Kjo gjykatë e BE-së pati vendosur, atëbotë, që futja e Prigozhinas në listë të sanksioneve është bazuar vetëm në lidhjet familjare me Prigozhinin, dhe që nuk ka të dhëna të mjaftueshme se ajo ka pasur ndikim në rolin e djalit të saj në luftën në Ukrainë.

Sipas gjykatës, BE-ja e ka futur Prigozhinan në listën e sanksioneve, me arsyetimin se ajo është pronare e kompanisë Concord Management and Consulting LLC, pjesë e grupit Concord, të themeluar dhe në pronësi të djalit të saj deri më 2019, dhe që udhëheq biznese tjera të lidhura me djalin e vet.

Gjykata ka thënë se Prigozhina, edhe pse ka aksione në Concord, nuk është pronare e kompanisë prej vitit 2017.

BE-ja, po ashtu, nuk ka arritur të vërtetojë se Prigozhina ka udhëhequr biznese tjera të lidhura me djalin e saj kur janë miratuar sanksionet.

Prigozhina është shtuar në listën e sanksioneve të BE-së, më 23 shkurt 2022, një ditë para nisjes së luftës së Rusisë në Ukrainë.

Në atë listë gjenden edhe anëtarë tjerë të Qeverisë ruse, banka, biznesmenë dhe ligjvënës.

Prigozhin, aleat i ngushtë i presidentit rus, Vladimir Putin, për kohë të gjatë, ka vdekur bashkë me nëntë persona tjerë, në një rrëzim misterioz të aeroplanit në gusht të vitit 2023, dy muaj pas nisjes së një rebelimi kundër udhëheqësisë ushtarake ruse. Ushtria e tij private, Wagner, ka luajtur rol të madh në avancimin e Rusisë në Ukrainë.

Zyrtarët dhe ligjvënësit amerikanë i janë kundërpërgjigjur Vladimir Putinit pasi udhëheqësi rus tha se heqja e mundshme e kufizimeve nga NATO ndaj Ukrainës për të nisur sulme me rreze të gjatë në Rusi do të nënkuptonte se vendet e NATO-s ishin “në luftë” me Rusinë.

“Kjo do të thotë se vendet e NATO-s – Shtetet e Bashkuara dhe vendet evropiane – janë në luftë me Rusinë”, u tha Putin gazetarëve rusë të enjten, duke shtuar “dhe nëse është kështu, atëherë, duke pasur parasysh ndryshimin e thelbit të konfliktit, ne do të marrim vendimet e duhura në përgjigje të kërcënimeve që do të na paraqiten”.

Reagimi i Putin provokoi një përgjigje të fortë në Uashington, ku zyrtarët e akuzuan Putinin për sulme në mënyrë që të trembin vendet e NATO-s që të mos mbështesin Ukrainën.

Senatori Jim Risch, anëtar i komitetit të marrëdhënieve të jashtme të Senatit, i tha Guardian se Ukraina duhet të ketë autorizimin për të goditur objektiva thellë brenda Rusisë, duke përfshirë bombarduesit aktivë rusë që lëshojnë raketa kundër qyteteve ukrainase.

“Kërcënimet e fundit të Putinit për konfrontimin e drejtpërdrejtë me NATO-n janë thjesht një përpjekje për të detyruar Perëndimin të largohet nga mbështetja e Ukrainës”, tha Risch.

Në vijim, senatori tha se “ai e di se sulmet me rreze të gjatë nga Ukraina do të shkaktonin dëme të konsiderueshme në përpjekjet e tij të luftës. Disa raketa ruse kanë rënë në territorin e NATO-s dhe NATO nuk e ka përshkallëzuar”

“Ukraina duhet të lejohet të mbrohet, pikë”, vazhdoi ai.

“Nëse kjo do të thotë të godasësh një bombardues rus që lëshon raketa kundër civilëve ukrainas nga hapësira ajrore ruse, atëherë Ukraina duhet të jetë në gjendje ta bëjë atë goditje”, shtoi ai.

Duke folur me gazetarët të premten, zëdhënësi i Këshillit të Sigurisë Kombëtare të SHBA-së, John Kirby, tha se ka të ngjarë të mos ketë njoftime për heqjen e kufizimeve në përdorimin e raketave të furnizuara nga Britania dhe Franca ndaj Ukrainës.
Por në të njëjtën kohë, ai tha se SHBA dhe aleatët e saj të NATO-s bëjmë llogaritë tona për ato që vendosim t’i ofrojmë Ukrainës.

“Kurrë nuk kam thënë se nuk i marrim seriozisht kërcënimet e zotit Putin”, tha Kirby, duke shtuar “ai fillon të tundë fuqinë bërthamore, për shembull, po, ne e marrim këtë seriozisht. Ne e monitorojmë vazhdimisht atë. Ai padyshim ka rezultuar i aftë për agresion. Ai është padyshim i aftë për përshkallëzim… Por kjo nuk është diçka që nuk e kemi dëgjuar më parë. Pra, ne e kemi parasysh atë”.

Presidenti Volodymyr Zelensky njoftoi të premten se 49 të burgosur lufte ukrainas ishin kthyer në vendin e tyre nga Rusia, duke publikuar fotografi të burrave dhe grave të mbështjellë me flamuj ukrainas.

“Dyzet e nëntë ukrainas janë në shtëpi,” tha Zelensky në mediat sociale.

“Këta janë ushtarë të forcave të armatosura të Ukrainës, Gardës Kombëtare, policisë kombëtare, shërbimit shtetëror të rojes kufitare , si dhe civilët tanë,” tha Zelensky.

Ai ka  shtuar se përfshihen dhe luftëtarë nga beteja e Mariupolit në Azvostal të vitit 2022.