Kryetari Hyseni dhe ministri Çeku vizitojnë Kullën e Sahit Agës në Zabel

Gjilani

Kryetari Hyseni dhe ministri Çeku vizitojnë Kullën e Sahit Agës në Zabel

Më: 15 dhjetor 2021 Në ora: 15:02
Pamje nga vizita

Kryetari i Komunës së Gjilanit, Alban Hyseni së bashku me ministrin e Kulturës, Rinisë dhe Sportit, Hajrullah Çeku, kanë vizituar të mërkurën restaurimet e xhamisë së vjetër në Velekincë dhe Kullën e Sahit Agës në lagjen Zabel.

Ministri Çeku, pasi e uroi kryetarin Hyseni për marrjen e detyrës, ka thënë se Gjilani ka shumë monumente dhe potencial për ta shtuar listën e aseteve të mbrojtura.

“Ministria mbron, financon ndërhyrje e restaurime, por është shumë me rëndësi faza e funksionalizimit, e kthimit në jetë të momumenteve dhe këtu roli i Komunës është shumë i rëndësishëm që të sigurohet faza pas restaurimit. E mira është që kryetari Hyseni e ka një qasje tjetër krahasuar me komunat tjera, e kupton këtë si aset të Komunës së tij, i cili i sjell zhvillim e dobi komunitetit”, ka thënë ministri Çeku.

Ndërkaq, kryetari i Komunës së Gjilanit, Alban Hyseni, pasi e falënderoi ministrin Çeku për vizitën, ka konfirmuar se si Komunë do të jenë gjithmonë të hapur për bashkëpunim, duke mirëpritur interevenimet dhe punën në monumentet e mbrojtura të trashëgimisë kulturore.

“Kemi disa ide e projekte që duhet të shtyhen përpara dhe shpresoj në një takim sa më të shpejt me ministrin Çeku në cilësinë e kryetarit të Komunës”, ka thënë kryetari Hyseni.

Në këto vizita kanë qenë të pranishëm edhe kryeimami i Këshillit të Bashkësisë Islame në Gjilan, Ilaz Mustafa, sikurse edhe Artan Hoxha, drejtor i Qendrës Rajonale për Trashëgimi Kulturore.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat